ने. सं. ११४४ कौलाथ्व षष्ठी -

संविधान संशोधन याये फइ ला ?

येँ (नेपालभाषा टाइम्स)-एमाले व नेपाली कांग्रेस जानाः तयार याःगु न्हूगु गठबन्धनपाखें न्हूगु सरकार दयेकेगु जक मखु, संविधान संशोधन समेत यायेगु धकाः धाःसां नं संविधान संशोधन याये फइगु सम्भावना धाःसा मदुगु खँ धाःगु दु ।

प्रतिनिधिसभाया वर्तमान गणितीय समीकरण स्वल धाःसा संविधान संशोधन याये फइगु सम्भावना मदुगु खँ धाःगु दु । एमाले व कांग्रेपाखें आः गुकथं प्रतिगामी कथं संविधान संशोधन यायेगु धकाः खँ हयाच्वंगु खः, वयात कांग्रेस, एमाले व राप्रपा बाहेक मेपिंस समर्थन याइगु सम्भावना खने मदु । थ्व स्वंगू पार्टी जानाः दुई तिहाइ मत खाइगु सम्भावना मदुगुलिं संविधान संशोधन याये मफइगु खँ धाःगु दु ।
थ्वहे झ्वलय् नेकपा एमालेया अध्यक्ष केपी शर्मा ओलीं संविधान संशोधन पश्चगमन मजुइगु खँ धयादीगु दु । म्हिगः च्वंगु संसदीय दलया बैठकय् न्ववायेगु झ्वलय् वय्कलं उगु खँ धयादीगु खः ।

अध्यक्ष ओलीं राजनीतिक स्थायित्वया आधार तयार यायेगु खँ देय् व जनताया हितय् जुइ धासें धयादिल, ‘संविधान जारी जुइधुंकाः आः तक खनेदुगु समस्यायात ध्यानय् तयागु दु । अज्याःगु समस्या ज्यंकेगु कथं संविधान संशोधन यायेगु धयागु खः । राजनीतिक स्थायित्व मालेगु झ्वलय् संविधान संशोधन यायेगु खँ पश्चगमन मखु ।’

संविधानयात अझ बल्लाकेगु नितिं संविधान संशोधन यायेमाः धासें उकी फुक्कं दलतय्सं तिबः बीमाःगु खँ नं वय्कलं धयादिल, ‘देय्यात स्थायित्वया दिशाय् यंकेत तःधंगु दलत सहितया राष्ट्रिय सरकार दयेकेत्यनागु खः । थ्व सरकारय् फुकस्यां ब्वति कायेमाः ।’ उकथं हे म्हिगःया बैठकं तःधंगु दलत छथाय् च्वनाः सरकार दयेकेगु सहमति यायेधुंकाः विश्वासया मत कायेगु लँपुइ मवँसे राजीनामा बीत प्रधानमन्त्री पुष्पकमल दाहालयात इनाप नं याःगु दु ।

एमाले व कांग्रेसया न्हूगु गठबन्धनयात अशोक राई नेतृत्वया जसपां समेत समर्थन याःगु दुसां थुमिसं याइगु संविधान संशोधनयात धाःसा जसपां समर्थन याइगु सम्भावना मदुगु खँ धाःगु दु । थ्व निगू पार्टीं समानुपातिक समावेशी सिट मदयेका छ्वयेगु कथं संविधान संशोधनया तयारी यानाच्वंगु दु । तर थ्व संशोधनयात देय्या खास यानाः आदिवासी जनजातितय्सं कडा रुपं विरोध याना हःगु दु । यदि थुकथं संविधान संशोधन यात धाःसा उकिया विरुद्ध आन्दोलन याये मालीगु ख्याच्वः नं उमिसं बियाहःगु दु ।

थ्वहे झ्वलय् सभामुख देवराज घिमिरें प्रधानमन्त्री पुष्पकमल दाहालं थ्वहे असार २८ गते प्रतिनिधिसभाय् विश्वासया मत काइगु जानकारी याकादीगु दु । म्हिगः च्वंगु प्रतिनिधिसभाया बैठकय् सभामुख घिमिरें उगु जानकारी याकूगु खः । वंगु असार १७ गते एमाले व कांग्रेसं न्हूगु समीकरण दयेकेवं प्रधानमन्त्री दाहालं २१ गते संसद सचिवालययात पौ च्वयाः २८ गते विश्वासया मत कायेगु व्यवस्था यायेत इनाप याःगु खः ।