किपूया ज्या किपुली हे

किपू (नेपालभाषा टाइम्स) – किपू नगरपालिकां हे किपू नगरपालिका दुने जुइगु घरजग्गाया नामासारी यायेगु लिसें फुक्कं ज्या क्वचायेकेगु तयारी यानाच्वंगु दु। आवंनिसें छेँ बुँ मीमाःसा कलंकीया मालपोत कार्यालय वनेम्वायेक नगरपालिका दुने हे फुक्कं कथंया ज्या क्वचायेकेगु कथं नगरपालिकां तयारी यानाच्वंगु खँ किपू नगरपालिका-२ या वडाध्यक्ष रमेश डंगोलं कनादीगु दु ।

जग्गा नामसारी यायेगु निंतिं यायेमाःगु लेखापढी आः किपू नगरपालिकां भू-सेवा केन्द्र स्थापना यानाः यायेत्यंगु जानकारी नं वय्कलं बियादिल । वय्कःया कथं कलंकी मालपोत कार्यालय व किपू नगरपालिकाया दथुइ वंगु साउन २१ गते सहमति जुइधुंकूगु दु। नगरपालिका दुनेया जग्गा आः नामसारी यायेगु, घरजग्गा पास यायेगु, फुकुवा आदि यायेत माःगु लेखापदया ज्या नगरपालिकां हे जुइगु खँ धाःगु दु। किपू नगरपालिकाया स्थानीय जनतां सेवा कायेगु निंतिं नगरपालिकाय् निवेदन बीमाःसा नगरपालिकां निश्चित शुल्क कयाः विवरण जायेकाः उकिया प्रिन्ट (टोकनं) उपलब्ध याकी, उगु हे प्रिन्टया आधारय् मालपोत कार्यालय कलंकी वनाः थःगु ज्या क्वचायेके फइ ।

थ्वनापं आः याकनं हे किपूवासीतय् सुविधाया निंतिं नगरपालिका अन्तर्गत नं छगू मालपोत ज्याकू संचालन जुइत्यंगु दु ।