भारतीय राजदूत सक्रिय

येँ (नेपालभाषा टाइम्स)- आम चुनावया लिच्वः सार्वजनिक जुयाः स्थिति स्पष्ट जुया वयेवं नेपाःस्थित भारतीय राजदूतावास सक्रिय जुया वःगु दु । लिच्वः पिहां वयेवं आः नेपाःया लागिं भारतीय राजदूत नविन श्रीवास्तवं सरकार गठनया लागिं सक्षम जूगु सत्ता गठबन्धनया नेतातय्त नापलानाः खँल्हाबल्हा यानादीगु खः ।

राजदूत श्रीवास्तवं आः सरकार गठनया लागिं न्ह्यःने फुगु गठबन्धनया नेतात नेपाली कांग्रेसया सभापति लिसें प्रधानमन्त्री शेरबहादुर देउवा व नेकपा (माओवादी) या अध्यक्ष पुष्पकमल दाहालयात नापलानादीगु खः । राजदूत श्रीवास्तवं भारत गठबन्धनया हे सरकारया पक्षय् दुगु सन्देश समेत वय्कःपिंत बियादीगु खँ धाःगु दु ।

वंगु मंसिर ४ गते मतदान जुइ स्वयां न्ह्यः नं भारतीय गुप्तचर संस्था ‘र’ या प्रतिनिधित येँया थीथी थासय् च्वनाः चुनावया गतिविधि निरीक्षण याना वंगु खँ सूत्रं धाःगु दु ।