देय् दबू येँ महानगरया न्हापांगु बुसादँ

यल(नेपालभाषा टाइम्स)- नेवाः देय् दबू येँ महानगर समितिं थःगु न्हापांगु बुसादँ (स्थापना दिवस) हन । वंगु आइतवाः थनया कोपुण्डालय् च्वंगु सातोआकी भवनय् छगू ज्याझ्वः यासें देय् दबू येँ महानगर समितिया बुसादँ हंगु खः ।

येँ महानगर समितिया नायः शोभा महर्जन वज्राचार्यया सभापतित्वय् जूगु ज्याझ्वलय् मूपाहांकथं देय् दबूया केन्द्रीय नायः पवित्र वज्राचार्य झायादीगु खःसा विशेष पाहांकथं येँ जिल्लाया नायः धनबहादुर महर्जन तिमिला, राष्ट्रिय परिषद् दुजः उदेन न्हूसाय्मि झायादीगु खः ।

येँ महानगर समितिया न्वकु गीता सिख्राकारं लसकुस यानादीगु ज्याझ्वलय् मेम्ह न्वकु शैलेस डंगोलं महानगर समिति व समिति अन्तर्गतया थीथी वडापाखें थ्व दछिया अवधि दुने जूगु थीथी ज्याझ्वः, गतिविधि, क्रियाकलापया बारे जानकारी बियादीगु खः ।

मूपाहां केन्द्रीय नायः वज्राचार्यं देय् दबूया थीथी कचा संगठनत नीस्वनेगु झ्वलय् आः याकनं हे नेवाः अधिवक्ता (वकिल)तय् नं संगठन कचा दयेकेगु तयारी जुयाच्वंगु जानकारी बियादिल । लिसें वय्कलं येँ महानगर समितिं वइगु दिनय् देय्या दक्व नगर समितिया प्रतिनिधित्व जुइकथं बांबांलाःगु ज्या याना वने फयेमा धकाः भिंतुना नं बियादिल ।

विशेष पाहाकथं झायादीपिं येँ जिल्ला नायः महर्जन, राष्ट्रिय परिषद्या दुजः न्हूसाय्मि, येँ महानगर समितिया सल्लाहकार राजेन्द्रमान वज्राचार्य लगायतं भावी कार्ययोजना दयेकाः अझ उत्कृष्ट रुपं ज्या याना वने फयेमा धासें भिंतुना बियादीगु खः ।

सभापतिया थासं नायः वज्राचार्यं सुभाय् देछासे महानगर समितिं थ्व दछिया दुने यानागु ज्या बाहेकं वइगु दिनय् समितियात अझ च्वन्ह्याका यंकेगु ल्याखं थीथी ज्याझ्वः याना वनेगु व समितियात अझ विस्तार याना यंकेत कुतः यायेगु प्रतिवद्धता प्वंकादिल ।