नेपाल राष्ट्र बैंकय् कर्मचारी अभाव

येँ – नेपाल राष्ट्र बैंकय् कर्मचारी अभाव जूगु दु । देय्या धुकू कःघाना वयाच्वंगु राष्ट्र बैंकय् छक्वलं ६७ म्ह कर्मचारीं अवकाश काइगु जुइवं कर्मचारी अभाव जुइत्यंगु खः ।बैंक व वित्तीय संस्थाया अनुगमन व नियमनकारी निकाय राष्ट्र बैंकय् छक्वलं तःधंगु ल्याखय् कर्मचारीतय्सं अवकाश काइगु जुइवं थप समस्या ब्वलंगु खँ सीदुगु दु । अवकाश कायेत्यंपिं कर्मचारीत सकलें लछि न्ह्यवंनिसें हे विदाय् च्वंगु दु ।

वइगु जेठ ४ गतेनिसें अवकाश कायेत्यंपिं ६७ म्ह कर्मचारी सकलें वैशाख ४ गतेनिसें हे विदाय् च्वंगु खः । अवकाश कायेत्यंपिं सहायक निर्देशकनिसें निर्देशक तह तकया कर्मचारी खः । इपिं सकलें स्वीदँया सेवा अवधि व ५८ दँया उमेर थ्यंगुलिं अनिवार्य अवकाश कायेत्यंगु खः । अवकाश कायेत्यंपिं मध्ये अप्वःथें ३० दँया सेवा अवधि पूवंपिं खः । लोकसेवा आयोग व सरकारं बैंकया निंतिं आवश्यक कर्मचारी व्यवस्थापनय् ग्वाहालि मयाःगुलिं समस्या अप्वया वनाच्वंगु दु ।

आयोगं आः न्हूगु व्यवस्था कार्यान्वयनय् वःगुलिं कर्मचारी व्यवस्था याये मिले मजू धायेवं छक्वलं तःधंगु मात्राय् कर्मचारीयात अवकाश बीमाःगु स्थिति वःगु खः ।राष्ट्र बैंकय् न्हापा हे नं कर्मचारी अभावया कारणं प्रभावकारी रुवं ज्या याये मफयाच्वंगु इलय् थुकथं छक्वलं तःधंगु मात्राय् कर्मचारीं अवकाश काइगु जुइवं समस्या थप ब्वलंगु राष्ट्र बैंक स्रोतं न्ह्यथंगु दु । कर्मचारी अवकाशया कारणं बैंक–वित्तीय संस्थाया सुपरीवेक्षण, नियमन व विदेशी विनिमयया अनुगमन नापं सुपरीवेक्षणया ज्या मजुइगु जूगु दु ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु