मच्छिन्द्रयात न्हापांखुसी लिग उपाधी

येँ – त्रिभुवन आर्मी क्लबयात १–० गोलं बुकुसें मच्छिन्द्र क्लब न्हापांखुसी ए डिभिजन लिग च्याम्पियन जूगु दु । शनिवाः दशरथ रंगशालाय् जूगु कासाय् आर्मीया आत्मघाती गोलया ग्वाहालिं मच्छिन्द्रं न्हापांखुसी लिग उपाधी ल्ह्वंगु खः । आर्मी स्वयां छगू अंकं जक लिउने लानाच्वंगु मच्छिन्द्रया निंतिं म्हिगःया कासा त्याके हे माःगु अवस्थाय् दुगु खःसा आर्मीयात कासा कासा बराबरी याःसां गाःगु खः । उकिं म्हिगःया कासा फाइनल सरह हे जूगु खः ।

लिगया झिंस्वंगूगु कासा म्हितेगु झ्वलय् मच्छिन्द्रं झिगुलिइ विजय चूलाकूगु खःसा निगुलिइ बराबरी व छगू पराजित जूगु खः । थ्व ल्याखं मच्छिन्द्रयाके ३२ अंक दयेमाःगु खःसां थगुने रेलिगेशन जोनय् लाःगुलिं १ अंक कटौती याःगुलिं ३१ अंक सहित शीर्षस्थानय् च्वनाः मच्छिन्द्रं लिग उपाधी ल्ह्वंगु खः । थुकिया लिसें मच्छिन्द्र ५० लाख नगद सिरपाः नं त्याकूगु खः ।

आर्मीया विकास तामाङ आत्मघाती गोल यायेवं मच्छिन्द्र फाइनल सरहया कासा त्याकेत ताःलाःगु खः । कासाया ३३ औं मिनेटय् रञ्जित धिमालं थ्वाःगु फ्रिकिक विकास तामाङयात डिफ्लेक्ट जुसें आत्मघाती गोल जूवंगु खः । म्हिगः आर्मीया गोलकिपर विकास कुथु घाःपाः जूगु दु । बल बचे यायेगु झ्वलय् कुथु घाःपाः जूगुलिं १० मिनेट तक कासा दिकेमाःगु खःसा लिपा वयात रंगशालां तुं तप्यंक अस्पताल यंकूगु खः ।

थुगुसीया लिगय् प्रशिक्षकपाखे मच्छिन्द्रया प्रशिक्षक प्रवेश कटुवाल उत्कृष्ट प्रशिक्षक जूगु दु । थुकिया लिसें मच्छिन्द्रया हे विशाल राई उत्कृष्ट मिडफिल्डर व भरत खवास उत्कृष्ट फरवार्ड जूगु दु । अथेहे थ्रीस्टारया अनन्त तामाङ उत्कृष्ट डिफेन्डर, मनाङ मस्र्याङदीया दीप कार्की उत्कृष्ट गोलकिपर, एनआरटीया दर्शन गुरुङ उत्कृष्ट युवा कासामि जूगु दु । फेयर प्लेया सिरपाः थ्रीस्टारयात बिउगु दु ।

उत्कृष्ट जूपिं प्रशिक्षक, मिडफिल्डर, फरवार्ड, डिफेन्डर व गोलकिपरयां छगूत्या–छगूत्या लाखया दां सिरपाः त्याकूगु दुसा उत्कृष्ट युवा कासामि व फेयर प्ले टिमयात छगू छगू लाखया दां सिरपाः बिउगु दु ।

सम्बन्धित बुखँ

LEAVE YOUR COMMENTS