बागमतिया ‘भाषा कानून’ बारे देय् दबूया सहलह
येँ (नेपालभाषा टाइम्स)÷ नेपालभाषा व तामाङ भाय्यात बागमति प्रदेशय् सरकारी ज्याखँया भाषाया रुपय् लागू मयाःतले नेवाः समुदायं दिपाः हे मकासे पलाः न्ह्याका वनेगु खँ धाःगु दु ।
शनिवाः नेवाः देय् दबू पाखें याःगु छगू सहलह ज्याझ्वलय् न्ववानादीपिं वक्तातय्सं बागमति प्रदेशय् नेपालभाषायात नं ज्याखँया भाषा दयेकेगु लागिं निरन्तर रुपं पलाः न्ह्याका च्वनेगु खँ धाःगु खः ।
देय् दबू स्वनिगः विशेष प्रदेशया ग्वसालय् जूगु उगु ज्याझ्वलय् न्ववासें नेवाः देय् दबूया केन्द्रीय नायः पवित्र बज्राचार्यं बागमति प्रदेश राष्ट्रभाषा ऐन लागू मजूतले राजनीतिक दल, बागमति प्रदेशया सांसदतय्त निरन्तर रुपं खबरदारी यानाच्वनेगु नापं जनताय् वना नं माःगु कथं थुइकेगु ज्या यायेगु खँय् बःबियादिल ।
अथे हे देय् दबू स्वनिगः विशेष प्रदेशया कजि श्रीकृष्ण महर्जनं यदि भाषाया थुगु अधिकार प्राप्त मजुल धाःसा वा भाषा सम्बन्धी ऐन पारित मयात धाःसा आन्दोलन यायेत तकं तयार जुइमाः धयादिल ।
बागमति प्रदेशय् नेवाःभाय् व तामाङ भाय्यात सरकारी ज्या खँया भाय् कथं लागू याकेगु निंतिं मदिक्क कुतः यायेमाःगु व उकिया लागिं छु गज्याःगु पलाःन्ह्याके माली धइगु विषयय् सहलह यायेत उगु ज्याझ्वः याःगु खः । भाषा सम्बन्धी प्रस्तावित ऐन प्रदेशया मुख्यमन्त्रीयात लःल्हाये धुंकूगु दुसा आः संसदं पारित जुइवं कानुनक थं लागू जुइ । विधेयक पारित जुइवं उकियात गुकथं लागू याना यंकेगु व थ्व सवालय् प्रस्तावित ऐनय् छु छु खँ दुथ्याकातःगु दु धकाः सहलह यायेगु ज्या नं उगु ज्याझ्वलय् जूगु खः ।
देय् दबू स्वनिगः विशेष प्रदेशया नायः श्रीकृष्ण महर्जनया सभापतित्वय् जूगु उगु सहलह ज्याझ्वलय् बागमति प्रदेश सरकारं दयेकूगु कार्यदलया दुजःपिं प्रा.डा. ओमकारेश्वर श्रेष्ठ व भाषाविद् अमृत योञ्जन तामाङपिंसं नं पाहां कथं ब्वतिकयादीगु खः ।
वय्कःपिन्सं बाग्मती प्रदेश सरकारयात लःल्हानागु प्रस्तावित ऐनय् नेवाःभाय् व तामाङ भाषायात बागमति प्रदेशया सरकारी ज्या खँया भाषाया रुपय् लागू यायेगु नापं भाषाया खँयात कयाः सुनां नं अपमान यात, विभेदयात धाःसा वयात कानुनी कारवाही यायेफइगु अले सरकारी निकायपाखें नेवाःभाय् व तामाङ भाय्यात लागू यायेगु सवालय् आलताल यात धाःसा उकी दण्ड समेत बीफइगु खँ दुथ्याकातःगु जानकारी यानादिल ।
ज्याझ्वलय् नेवाः देय् दबूया केन्द्रीय न्वकुपिं उमेश स्थापित, शान्ताश्रेष्ठ, केन्द्रीय छ्याञ्जे मचाराजा महर्जन, स्वनिगः विशेष प्रदेशया बरिष्ठ न्वकु नविन थेच्वमि, मुख्य सचिव गणेशमान श्रेष्ठ, छ्याञ्जे गंगादेवी महर्जन, येँ जिल्लाया नायःधनबहादुर महर्जत तिमिला, ख्वपया नायो नरेश नेवाः नापं स्वनिगःया थीथी पालिकाया नेतृत्वपिंसं ब्वति कयादीगु खः ।
LEAVE YOUR COMMENTS