किपुली नं सतक विस्तार विरुद्ध संघर्ष

येँ – गैरन्यायिक सतक विस्तार विरुद्ध किपुली नं विरोध जूगु दु । वंगु कार्तिक २८ गते वडा नम्बर १ व २ पाखें मंकाः सुचं पिकयाः बिष्णुदेवी अस्पतालंनिसें ट्यांगला फाँट तक च्यागू मिटरया सतक विस्तार यायेगु सुचं पिकाःगु खःसा उकियात कयाः स्थानीय वासिन्दां मंकाः कथं विरोध यासें किपू नगरपालिकाया निगुलिं वडाय् ज्ञापन पौ बिउगु खः ।

ज्ञापनपती निगुलिं वडां स्थानीय जनताया सहमति मकासे सतक विस्तारया नामय् चिं तयेगु व सुचं पिकायेगु ज्याय् थःपिनिगु गम्भीर ध्यानाकर्षण जूगु खँ धयातःगु दु ।

उकथं हे ज्ञापन पती सुं नं नागरिकया छेँ व जग्गा कायेगु निंतिं नेपाःया संविधान कथं उचित क्षतिपूर्ति मुआब्जा बीमाःगु खँ धासें जग्गा प्राप्ती ऐन २०३४ व संविधानया धारा २५ स दुगु सम्पत्ति सम्बन्धी हक, संविधानया धारा २७ स दुगु आवास सम्बन्धी हक अःखः वडां ज्या न्ह्याकल धाःसा थःपिंत अमान्य जुइगु खँ न्ह्यथनातःगु दु ।

लिसें ज्ञापनपती तत्कालीन नगर विकास ऐन २०४५, आःया काठमाडौं उपत्यका विकास प्राधिकरण ऐन २०४५ स मुआब्जा व क्षतिपूर्ति स्पष्ट रुपं न्ह्यथनातःगु दु धासें सर्वोच्च अदालतया वृहत संयुक्त इजलासं तकं मुआब्जा व क्षतिपूर्ति बियाः जक सतक विस्तारया निंतिं नागरिकया छेँ जग्गा कायेत आदेश बिउगु खँ नं लुमंकाच्वना धकाः च्वनातःगु दु ।

अथे हे ज्ञापन पती सर्वोच्चया फैसला अःखः नागरिकया हक विरुद्ध जुइगु गुगुं नं कथंया गतिविधिया जिम्मा सम्बन्धी निकाय कायेमाः धकाः ख्याच्वः नं बियातःगु दु । मेखे किपू नगरपालिकायाया २ नम्बर वडाध्यक्ष रमेश महर्जनं धाःसा विकास निर्माणया झ्वलय् स्थानीय वासिन्दायात मर्का जुइ कथं थःपिं न्ह्याः मवनेगु खँ धयादीगु दु ।

म्हिगः ‘नेपालभाषा टाइम्स’ लिसें खँ ल्हासें वय्कलं स्थानीय जनताया विरुद्ध थःपिं वनेगु खँ जुइमखु धयादिल । वय्कःया कथं आः गुलि सतक दुगु खः उगु हे कथं पीच यायेगु सोच नगरपालिकां दयेकाच्वंगु धासें स्थानीय जनताया सहमति कथं हे थःपिं न्ह्याःवनेगु तयारी यानाच्वनागु खँ नं कनादीगु दु ।

वय्कःया कथं विस्तार यायेत्यंगु सतकया ब्या म्होति नं खुगू मिटर तक जुइमाः धासें वयां अप्वः विस्तार यायेगु निंतिं क्षतिपूर्ति बीमाःगु अवस्था वल धाःसा सरकारयात सिफारिस यायेमाः खँ नं कनादीगु दु ।