अमेरिकां त्वानाःसिँ लित बिल

येँ(नेपालभाषा टाइम्स)- नेपालं खुया यंकाः अमेरिका थ्यनेधुंकूगु त्वानाःसिँ नेपाःयात लित बिउगु दु । नेपालं खुया यंकाः अमेरिका थ्यंगु पुरातात्विक महत्वया निगः त्वानाःसिँ नेपाःयात लित बिउगु खः ।

नेपाःस्थित अमेरिकी दूतावासया डेपुटी चिफ अफ मिसन म्यानुअल पी. मिकल्लर व कन्सुलर अबिगेल के. एरोनसनं उगु त्वानाःसिँ नेपाःयात लित बिउगु खः । पुरातत्व विभागय् जूगु छगू ज्याझ्वलय् नेपाःस्थित अमेरिकी दूतावासया प्रतिनिधिं संस्कृति पर्यटन तथा नागरिक उड्डयन मन्त्रालयया सचिव महेश्वर न्यौपानेयात उगु त्वानाःसिँ लःल्हानादीगु खः ।

अमेरिकां नेपाःयात १३५ सेमी हाकःगु, २१ सेमी ब्या व ११० किलोग्रामया निगः त्वानाःसिँ लित बिउगु खः । नेपाःयात लित बिउगु त्वानाःसिँ १३ व १४ औ शताब्दीया जूगु खँ धाःगु दु । सन् १९८०या दशकय् नेपालं खुया यंकूगु उगु त्वानाःसिं येँ महानगरपालिका १२ वडाया हिउमत त्वालय् च्वंगु नारायण द्यःया देगःया खः ।

छम्ह अमेरिकी नागरिकं मुंकाः तःगु उगु त्वानाःसिँ सन् २००३ य् आर्ट इन्ष्टिच्युट अफ शिकागोय् जूगु प्रदर्शनी तःगु खःसा उम्ह अमेरिकी नागरिकया इच्छाकथं उगु त्वानाःसिँ नेपाःयात लित बिउगु खः। उगु त्वानाःसिं अमेरिकास्थित नेपाली महावाणिज्य दूतावासया समन्वयय् युएस आर्ट कम्पनीया सहकार्यय् नेपाः लित हःगु खः ।

उगु इलय् विभागं नेपाःपाखें थीथी इलय् खुया यंकूगु पुरातात्विक, सांस्कृतिक, धार्मिक महत्वया वास्तु, मूर्ति व काष्ठकलाया ज्वलंत अमेरिकालिसें बेलायत, अस्टे«लिया, भारत, तिब्बत, जर्मनीं नेपाःयात लित बीधुंकूगु जानकारी नं बिउगु खः ।

सम्बन्धित बुखँ

LEAVE YOUR COMMENTS