विकल्प बिउसा वस्ती त्वःतेत सुकुम्बासी तयार

येँ (नेपालभाषा टाइम्स)- येँया सुकुम्बासीतय्सं यदि थःपिंत वैकल्पिक आवासया व्यवस्था जुल धाःसा सुकम्बासी बस्ती त्वःतेत तयार दुगु खँ धाःगु दु ।

उमिसं येँ मनपाया मेयर बालेन साहयात ध्यानाकर्षण पौ लःल्हासें भूमि सम्बन्धी ऐन व नियमावलीया आधारय् भूमिहीन, सुकुम्बासी व अव्यवस्थित रुपं च्वनाच्वंपिनि म्हसीका व लगत संकलन लिसें वैकल्पिक आवासया व्यवस्था यानाः जक बस्ती चीकेत इनाप याःगु दु ।

येँ मनपा १०, ११ व ३१ वडाया सुकुम्बासीपाखें ध्यानाकर्षण पौ बिसें नेपाःया संविधान, भूमि सम्बन्धी ऐन, नियम व महानगरपालिकां न्हापा प्वंकूगु प्रतिबद्धता कथं भूमिहीन सुकुम्बासी व्यवस्थित यायेत माग याःगु खः ।

अथे हे ध्यानाकर्षण पतिइ थःपिंत आवास विहीन यायेगु, जीविकोपार्जनया आधारं बञ्चित यायेगु, उठीबास यायेगु ज्या गम्भीर मानवअधिकार उल्लंघन खः व राष्ट्रिय कानुनं प्रतिबन्धित जक मखुसें गम्भीर अन्तर्राष्ट्रिय निगरानीया विषय तकं जुइगु खँ नं न्ह्यथनातःगु दु ।

उकथं हे मनपा विरुद्ध थःपिसं उच्च अदालतय् दायर यानागु मुद्दाया बसहय् नं येँ मनपां कानुन कथं सुकुम्बासीया म्हसीका व व्यवस्थापनय् ग्वाहालि यायेगु धकाः मनपाया कानुन व्यवसायीं स्वीकार याःगु खँ नं न्ह्यथनातःगु दु ।