ने. सं. ११४३ चौलाथ्व पारू -

मैत्रेय युवा संघया नीनिक्वःगु बुदिं

ख्वप – मैत्रेय युवा संघया नीनिक्वःगु बुदिं विशेष ज्याझ्वः यासें हन । थनया थथुबहीस्थित जयकीर्ति विहारय् जूगु ज्याझ्वः संघया अध्यक्ष मय्जु जमुना गोसाईया सभापतित्वय् जूगु खःसा मुनि विहारया भिक्षु अर्जुन मूपाहाकथं बिज्याःगु खः । पंचशील प्रार्थना यासें शुरु जूगु ज्याझ्वलय संघया लुनिमा चित्रकारं संस्थाया वार्षिक प्रतिवेदन व प्रमिला धुख्वं आर्थिक प्रतिवेदन न्ह्यब्वयादीगु खः ।

ज्याझ्वलय् सल्लाहकार तीर्थ राज वज्राचार्यं संघं न्ह्याका वया च्वंगु परियत्ति शिक्षा व थथुबहीया सम्पदा संरक्षणया निंतिं जुयाच्वंगु गतिविधिया बारे जानकारी बियादिल । कुथुबही विकास समितिया नायः प्रा. सिद्धिरत्न शाक्यं ख्वपया विद्यालयस्तरय् स्थानीय पाठ््य क्रमय् संस्कृति व सम्पदाया विषय दुथ्याकाः थनया थीथी सम्पदा, नखःचखःयात नं दुथ्याकेगु झ्वलय् ख्वपया पंचदान, सम्यक दानया विषययात नं दुथ्याकेगु जानकारी बियादिल ।

लिसें वय्कलं छसिकथं बौद्ध शिक्षायात कयाः नं स्यनेकने जुइगु नं कनादिल । परम्परागत बौद्ध धर्म संघ ख्वपया नायः पुष्परत्न शाक्यं परियत्ति शिक्षां बौद्ध संस्कृतिया विकास जुइगु खँ न्ह्यथनादिसें परियत्ति शिक्षा प्रचार प्रसारय् संघपाखें जुयाच्वंगु कुतःयात कयाः च्वछायादिल ।

अथे हे भक्तपुर बौद्ध सम्पदा संघया पद्मसुन्दर शाक्यं बौद्ध सम्पदा संरक्षणय् संघं न्ह्याका वयाच्वंगु ज्याय् ग्वाहालि यायेगु प्रतिवद्धता प्वंकादिसें इलामय् निर्माण जुयाच्वंगु बुद्धिमूर्ति व विहारया निंतिं आर्थिक ग्वाहालि यायेगु बचं बियादिल ।

बौद्ध संघ ख्वपया सचिव सुगतरत्न वज्राचार्यं नं नुगःखँ तयादीगु ज्याझ्वलय् ख्वपया आपालं बौद्ध संस्थाया प्रतिनिधिलिसें बौद्ध विद्वानपिनिगु सहभागिता दुगु खः ।संघयात कम्प्युटर ग्वाहालि याःगु संस्था भक्तपुर बौद्ध सम्पदा संघयात कदर पत्र नं लःल्हाःगु ज्याझ्वलय् माइला दोंगं सुभाय् देछानादीगु खः ।