लामिछाने व वाग्ले दथुइ छु खँल्हाबल्हा जुल ?
धौख्यःया रिसोर्टय् निम्ह नेता दथुइ चच्छि न्हिछि च्वनाः वार्ता
येँ (नेपालभाषा टाइम्स) – राष्ट्रिय स्वतन्त्र पार्टीया सभापति रवि लामिछाने व उपसभापति लिसें अर्थमन्त्री डा. स्वर्णिम वाग्ले दथुइ म्हिगः व म्हीग धौख्यःया छगू रिसोर्टय् नापलानाः खँल्हाबल्हा जूगु दु । सभापति व उपसभापति दथुइ छु खँल्हाबल्हा जुल धयागु स्पष्ट रुपं पिहां मवःनिसां थ्व खँल्हाबल्हायात धाःसा अर्थपूर्ण रुपय् काःगु दु ।
वय्कःपिं दथुइ धौख्यःया दुसित थानी रिसोर्टय् नापलायेगु ज्या जूगु खः । शनिवाः न्हिनय् ३ बजे अर्थमन्त्री वाग्ले रिसोर्टय् थ्यंगु खःसा वयां २० मिनेट लिपा लामिछाने जहान निकिता पौडेललिसें रिसोर्टय् थ्यंगु खः ।
अर्थमन्त्री वाग्लेया लगानी दुगु उगु रिसोर्टय् निम्हेसिया दथुइ छु खँ जुल धइगु खँ सार्वजनिक मजूनि । तर सभापतिं रिसोर्ट वनाः अर्थमन्त्री नापलाःगु खँयात कयाः वंगु छवाः न्ह्यः प्रधानमन्त्री बालेन साह व सभापति लामिछाने दथुइ जूगु खँयात कयाः सभापतिं अर्थमन्त्रीयात जानकारी याकूगु अनुमान राजनीतिक वृत्तय् जुयाच्वंगु दु । छवाः न्ह्यः प्रधानमन्त्री बालेन साह लामिछानेया बुढानिलकण्ठय् च्वंगु छेँय् वनाः खँल्हाबल्हा याःगु खः । उगु खँल्हाबल्हाया झ्वलय् सभापति लामिछानें प्रधानमन्त्री व मन्त्रीतय् ज्यायात कयाः असन्तुष्टि प्वंकूगु खःसा प्रधानमन्त्री साहं अर्थमन्त्री वाग्लेया ज्यायात कयाः असन्तुष्टि प्वंकूगु खः ।
निम्हेसिया दथुइ सहलहया झ्वलय् सभापति लामिछाने प्रधानमन्त्रीया राजनीतिक सल्लाहाकार कुमार बेन लिसे सचिवालयया दुजःपिंत हिलेमाःगु प्रस्ताव यानादीगु खःसा प्रधानमन्त्री साहं अर्थमन्त्री वाग्लेयात हिलेमाःगु प्रस्ताव यानादीगु खः ।
सभापति लामिछाने प्रधानमन्त्रीया राजनीतिक सल्लाहकार व सचिवालयया कारणं थीथी कथंया विवाद वयाच्वंगु धासें सचिवालय हिलेमाःगु खँ धाःगु खः । उगु इलय् सभापति लामिछाने पासपोर्ट छापे यायेगु खँय् प्रधानमन्त्रीया सचिवालयं अनावश्यक हस्तक्षेप यायेगु ज्या जूगु धासें असन्तुष्टि प्वंकादीगु खः ।
प्रधानमन्त्री साहं अर्थमन्त्री वाग्लें स्वास्थ्य, शिक्षा व मतय् कर काःगु कारणं सरकार मछिंगु अवस्थाय् लाःगु धासें अर्थमन्त्री वाग्लेयात चीकेमाःगु खँ धाःगु खः । तर निम्हेसिया प्रस्तावयात कयाः थप खँ न्ह्याःवंगु मदुनि ।
प्रधानमन्त्री व सभापति दथुइ जूगु खँल्हाबल्हायात कयाः शनिवाः निम्ह नेतातय् दथुइ सहलह जूगु अनुमान दु । प्रधानमन्त्री साहं अर्थमन्त्री वाग्लेयात चीकाः सांसद विदुषी राणायात अर्थमन्त्री दयेकेत्यंगु चर्चा जुयाच्वंगु दु । अथेहे मन्त्रिपरिषदया ज्यायात कयाः थौंकन्हय् रास्वपाया सांसदतय्सं तकं न्ह्यसः थनेगु यानाच्वंगु खँय् नं निम्ह नेतातय् दथुइ सहलह जूगु खँ सूत्रं धाःगु दु । सभापति लामिछाने व अर्थमन्त्री वाग्ले म्हिगः हे येँय् लिहां वयेधुंकूगु दु ।
LEAVE YOUR COMMENTS