रास्वपां सरकार त्वःतीगु सम्भावना
येँ (नेपालभाषा टाइम्स)- वर्तमान सरकारय् गृहमन्त्री व अर्थमन्त्री बीगु सम्भावना मदयेवं राष्ट्रिय स्वतन्त्र पार्टीं पुष्पकमल दाहालया सरकारयात बियातःगु समर्थन लित कायेगु मनःस्थिति दयेकूगु दु । उगु पार्टीया अध्यक्ष रवि लामिछानें सञ्चार माध्यमतलिसे खँ ल्हासें वर्तमान सरकारयात थःपिंसं बिया तयागु समर्थन लित काये फइगु खँ कनादीगु दु ।
सरकारयात बियातःगु समर्थन लित कायेगु लागिं रास्वपां त्वह धाःसा भ्रष्टाचारयात दयेकूगु दु । थःपिंसं भ्रष्टाचारया फाइल चायेकेगु धकाः धयाच्वनागु खःसां सरकारं अज्याःगु पुलांगु फाइल चायेके मफइ कथंया कानून हःगु कारणं थ्व सरकारय् थःपिं च्वने मफइगु खँ अध्यक्ष लामिछानें कनादीगु दु ।
तर सूत्रतय्सं धाःसा चुनाव त्याका वयेधुंकाः सरकारय् गृहमन्त्री सहित वनेगु धकाः माग याःगु खःसां सरकारं गृह मन्त्रालय बीगु संकेत मबिउगु कारणं सरकारं पिहां वयेगु मनःस्थिति रास्वपां दयेकूगु खँ धाःगु दु ।
लुमंकेबहः जू, थ्व स्वयां न्ह्यः नं रास्वपां गृह मन्त्रालय मबिउ धइगु हे त्वहचिनाः सरकार त्वःतूगु खः । अबले माओवादीं नागरिकताया काण्ड तच्वयाच्वंगु व पासपोर्ट काण्ड अझं ल्यनाच्वंगु कारणं छक्वलं गृह मन्त्रालय बी मफइगु खँ धाःगु खः । आः चुनाव त्याका वयेधुंकाः लामिछानें थःत जनतां हे ‘क्लिन चिट’ बिउगु दावी यानाच्वंगु दु ।
प्रधानमन्त्री दाहालं थःपिंसं निक्वःखुसी विश्वासया मत कायेत्यंगु इलय् रास्वपाया नं समर्थन काये माःगु जुयाः लामिछानेयात लानाच्वंगु पासपोर्ट सम्बन्धी प्रकरणय् मुद्दा चले यायेम्वाः धकाः महान्यायाधिवक्तापाखें निर्णय याके बिउगु खः ।
अथे हे रास्वपां वर्तमान सरकारय् डा. स्वर्णिम वाग्लेयात अर्थमन्त्री बीमाः धकाः दावी याये फइगु खँ नं धाःगु दु । तर सरकारं डा. वाग्लेयात अर्थमन्त्री दयेकीगु नं सम्भावना मदु । वाग्ले कांग्रेसयात हाथ्या बियाः चुनावय् दंम्ह खः । उकिं वय्कःयात कांग्रेसं हे अर्थमन्त्री दयेकीगु सम्भावना मदु । थौंकन्हय् अर्थ मन्त्रालय कांग्रेसया हे ल्हातय् दु । अर्थ व गृह निगुलिं मन्त्रालय थःपिंत मवइगु जुइवं रास्वपां भ्रष्टाचारया त्वह चिनाः सरकारयात बियातःगु समर्थन लित कायेगु तयारी यानाच्वंगु खँ धाःगु दु ।
LEAVE YOUR COMMENTS