माधवनारायण धलंया तयारी न्ह्यात

सक्व(नेपालभाषा टाइम्स)- थनया दकलय् तःधंगु धार्मिक सांस्कृतिक महत्वया श्री माधवनारायण व्रत (धलं दनेगु) या तयारी शुरु जूगु दु । व्रतया तयारीया झ्वलय् कजि, कजिनी व द्यः ज्वनीम्ह ल्ययेगु ज्या जूगु दु ।

थुगसी श्री माधवनारायण व्रतय् कजिकथं सुरजनारायण श्रेष्ठ व कजिनीकथं वय्कःया हे जहान सविना श्रेष्ठयात ल्यःगु दु । श्री माधवनारायण द्यःयाथाय् किसलिं छानादीवं वय्कःपिं निम्हेसितं कजि व कजिनीया जिम्मेवारी बिउगु खः ।

अथे हे थुगुसी धलं दनेगु इलय् द्यः ज्वनेगु निंतिं सहन श्रेष्ठयात जिम्मेवारी बिउगु दु । श्री माधवनारायण धलं दनीबलय् अप्वःथें द्यः ज्वनेगु जिम्मेवारी कजि नं थः विश्वास दुम्ह व्यक्तियात ल्ययेगु याइ । द्यः ज्वनीम्हेसित लछितक धलं दनेगु झ्वलय् म्ह्याय्मचाया रुपय् कायेगु याइ ।

थुगुसी श्री माधवनारायण मेला थ्व हे वइगु पुस २२ गतेनिसें शुरु जू वनाच्वंगु दु । लछितक न्ह्याइगु व तसकं थाकूगु व्रतकथं कयातःगु माधवनारायणया धलं दनेत सक्व, येँ, यल, ख्वप, भ्वतं, पन्तिलिसें थीथी थासं आपालं मनूत वयेगु याः । धलं दनेत आपालं दइगु व इमित व्यवस्थित यायेगु नापं सुविधायात ध्यानय् तयाः पुस २१ गत स्वयां न्ह्यःहे नां च्वकेत श्री माधवनारायण स्वस्थानी व्रत तथा शालीनदी सुधार समितिं इनाप याःगु दु ।

समितिया अध्यक्ष बालकृष्ण श्रेष्ठं न्हापा हे नां च्वका तल धाःसा धलं दनीपिं गुलि दइ धइगु यकीन याये फइगु नापं इमिगु सुविधाया निंतिं व्यवस्थापन यायेत अःपुइगु जानकारी बियादिल ।

श्री माधवनारायणया व्रत संचालनया तयारी वंगु थिंलाथ्व द्वादशिनिसें शुरु जूगु खः । थ्वकुन्हु साँवागणं विशेष पुजा यायेवं व्रतया तयारी शुरु जुइगु खःसा थ्वकुन्हुनिसें हे न्हूपिंत साँवागणया रुपय् दुथ्याकाः भजन स्यनेगु नं शुरु जुइ ।