निम्ह अध्यक्ष स्वीकार यायेफइमखु

येँ – नेकपा एमालेया महासचिव ईश्वर पोखरेलं माधव नेपाल पक्षं तःगु निम्ह अध्यक्षया प्रस्ताव स्वीकार याये मफइगु खँ धयादीगु दु । महासचिव पोखरेलं सञ्चार माध्यमपाखें वःगु उगु प्रस्ताव पार्टीया विधि व विधान स्वयां बिस्कं कथं वःगु धासें उकियात स्वीकार यायेमफइगु खँ धयादीगु खः ।

म्हिगः पार्टी केन्द्रीय ज्याकुथिं ग्वसाः ग्वःगु खीर नयेगु ज्याझ्वलय् सञ्चारकर्मीत लिसे खँ ल्हायेगु झ्वलय् वय्कलं उगु खँ धयादीगु खः । वय्कलं पत्रकारतय्गु न्ह्यसःया लिसः बीगु झ्वलय् धयादिल, ‘कार्यदलं दयेकूगु सहमित कथं पार्टीया केन्द्रीय समितिं अनुमोदन याःगु झिगू बुँदे सहमति कार्यान्वयन यानाः पार्टीयात छप्पँ याना यंकेमाः धइगु जिमिगु मत दु ।’

वय्कलं पार्टी विधि व विधान स्वयां बिस्कं कथं न्ह्याः वनेमफइगु खँ धासें महाधिवेशनं पारित याःगु विधान नियमावली कथं पार्टी २०७५ जेठ २ गते लिहां वनेगु खँ जुयाच्वंगु जानकारी बियादिसें धयादिल, ‘विद्यमान विधान व नियमावलीइ छु दुु ? उकिं अनुमति बीगु, उकिं स्वीकार याइगु, उकी दुगु व्यवस्थायात हे पालना यायेमाल नि ।’

माधव नेपाल पक्षपाखें न्हिथं थीथी कथंया प्रस्ताव वयेगु यानाच्वंगु खँ न्ह्यथँसें महासचिव पोखरेलं अज्याःगु प्रस्ताव थःम्ह मथू धकाः नं धयादिल । वय्कलं पार्टी दुने खनेदुगु विग्रहकारी स्थितिया याकनं अन्त्य जुइमाःगु खँ धासें उकिया निंतिं थःपिंसं जिम्मेवारीपूर्वक भूमिका म्हिताच्वनागु खँ नं धयादिल ।

वय्कलं एकताया विषययात याकनं क्वचायेकाः पार्टीया महाधिवेशन तयारीया ज्या न्ह्याकाच्वनागु खँ कनादिसें नेपाल पक्षलिसे एकताया विषय याकनं हे निर्णय जुइ फइगु खँ नं धयादीगु दु ।