छात्रावासया गतिविधिया नियमन व अनुगमन जुइमाः

येँ – येँ महानगर लागा दुनेया छात्रावासयात नियमन यायेमाःगु सरोकारवालातय्सं धाःगु दु । येँ महानगर लागा दुने संचालन जुयाच्वंगु छात्रावास व अन दुने जुइगु गतिविधियात सुरक्षाया दृष्टिकोणं नियमन व अनुगमन यायेमाःगु खँ धाःगु दु ।

‘छात्रावास व्यवस्थापनय् सुरक्षा चुनौति’ विषयय् जूगु छगू अन्तक्र्रियात्मक ज्याझ्वलय् नवासें येँ महानगरपालिकाया उपप्रमुख हरिप्रभा खड्गी श्रेष्ठं छात्रावास संचालन यानाच्वंपिं संचालकत विद्यार्थीतय् जिम्मेवार अभिभावक जुइ फयाच्वंगु दु कि मदु, छात्रावास दर्ता यायेगु व करया दायराय् वयाच्वंगु दु मदु धइगु खँय् नियमित रुपं अनुगमन यायेगु ज्या जुइमाः धयादिल ।

लिसें वय्कलं अज्याःगु छात्रावास दुने जुइगु गतिविधि सुरक्षाया ल्याखं नं नियमित रुपं अनुगमन जुइमाः धयादिल । नेपाल छात्रावास एशोसियसनया छगू तथ्यांककथं स्वनिगलय् जक खुसः स्वयां अप्वः छात्रावास संचालन जुयाच्वंगु दुसा उकीमध्ये न्यासः एशोसियसनया दुजः जुयाच्वंगु दु ।

संचालनय् दुगु छात्रावासया न्युनतम मापदण्ड छु जुइमाः गन दर्ता जुइमाःगु, छात्रावासय् च्वनीपिं सु सु खः, गज्याःपिं च्वनेगु यानाच्वंगु दु धइगु थेंज्याःगु सुरक्षाया ल्याखं चिउताःया विषय जुयाच्वंगु दु ।

सम्बन्धित बुखँ

LEAVE YOUR COMMENTS