संस्थागत ब्वनेकुथिया नां खस् नेपाली भासं

येँ महानगरपालिकां संस्थागत ब्वनेकुथिया नां व ब्वँमिपिंत उपलब्ध याकीगु म्हसीका पौ खस् नेपाली भासं हे तयेगु व्यवस्था याकीगु जूगु दु । महानगरया शिक्षा अधिकारी सीताराम कोइरालां आः वइगु न्हूगु शैक्षिक सत्रनिसें थुकियात अनिवार्य यायेगुपाखे लगे जुयाच्वनागु धयादिल ।

‘अंग्रेजी भाषाय् ब्वनेकुथि व ब्वँमिया नां दुगुलिं थः मस्त गुगु स्कुलय् ब्वनीगु व इमिगु नां छु खः धइगु बारे अभिभावकय् अन्योल खनेदत’ वय्कलं धयादिल, ‘उकिं थ्व विषयय् अभिभावकयात सहज याकेत थुकथंया व्यवस्था यायेत्यनागु खः ।’शिक्षा अधिकारी कोइरालां ब्वनेकुथिं अंग्रेजीइ नं च्वयेगु वा मच्वयेु धइगु बारे धाःसा स्वतन्त्र त्वःता बीगु जानकारी बियादिल ।

थ्व स्वयां न्ह्यः सरकारं अंग्रेजी नामं दुगु कलेजया नां खस् नेपाली भासं, मौलिक संस्कृति पिज्वइकथंया तयेत धासें निर्देशन बिउगु खःसां नं कलेजं उगु निर्देशनयात आतकं कार्यान्वयन याःगु मदुनि । महानगर लागादुने जक ६४० गू संस्थागत ब्वनेकुथि दु ।

वय्कलं शिक्षा समितिपाखें निर्णय यायेधुंकाः व हे कथं खस् नेपाली भाय्यात प्रभावकारी रुपं कार्यान्वयन याकेत निजी तथा आवासीय विद्यालय अर्गनाइजेसन, नेपाल (प्याब्सन) व राष्ट्रिय निजी तथा आवासीय विद्यालय अर्गनाइजेसन, नेपाल (एनप्याब्सन)यात निर्देशन बीगु जानकारी बियादिल ।

अथे हे महानगरपालिकां माघ महिना दुने सामुदायिक ब्वनेकुथिया शिक्षकयात तलब उपलब्ध याकीगु जूगु दु । महानगरया शिक्षकं मंसिर थुखे तलब काये मखंगुलिं शिक्षकया खाताय् हे तलब वनीकथं ज्या जुयाच्वंगु धयादिल । ‘शिक्षकआत इमिगु खाताय् तलब नकेत जिमिसं आः अन्तिम तयारी यानाच्वनागु दु’, वय्कलं धयादिल, ‘आः माघ महिनातकया तलब इमिगु थःगु हे खाताय् तयेगु जुइ ।’

महानगरं थ्व स्वयां न्ह्यः ब्वनेकुथिइ हे तलब छ्वयेगु यानाच्वंगु व अनं हे शिक्षकं तलब तयेगु याना वयाच्वंगु खः ।महानगरय् ९१ गू सामुदायिक ब्वनेकुथिइ झिंच्यासः व स्वीम्ह शिक्षक दु । अथे हे महानगरं ब्वनेकुथिया शिक्षक, कर्मचारी व अभिभावकयात गुगुं नं वैदेशिक भ्रमण, तालिम, सभा, अवलोकन भ्रमण, कासा, मैत्रीपूर्ण भ्रमण वा स्वदेशय् हे शैक्षिक भ्रमण वा अज्याःगु छुं नं ज्याया निंतिं यंकेबलय् विभागया पूर्व स्वीकृति अनिवार्य कायेमाःगु व्यवस्था तकं यायेधुंगु शिक्षा अधिकारी कोइरालां कनादिल ।

थुकथं ब्वनेकुथिया आर्थिक पारदर्शितायात प्रभावकारी दयेकेत व ब्वनेकुथि बालं बियाः आम्दानी याइगु ब्वनेकुथिं प्राप्त ध्यबाया पारदर्शितायालिसें उपलब्धिमूलक ज्या यायेगु निंतिं शिक्षा समितिपाखें कार्यविधि तयार यायेगु ज्या जुयाच्वंगु दु ।

महानगर दुनेया ब्वनेकुथिं ब्वँमिपिंत च्वनेगु थाय् उपलब्ध मयाकुसे कक्षा क्वथा बालं बीगु यानाच्वंगुलिं कार्यविधि नालाः जक बालं बीगु व्यवस्था यायेत व क्वथा बालं बियाः टेन्टय् ब्वँमिपिंत ब्वंकेगु यानाच्वंगु लुत धाःसा प्रधानाध्यापकयात कारवाहीतकं यायेगु जानकारी बियादिल ।

सम्बन्धित बुखँ

LEAVE YOUR COMMENTS