इजलासय् सा

अदालतय् जुइगु छुं नं कथंया मुद्दा मामिलाय् वादी, प्रतिवादी व साक्षी दइ । अदालतं नं फैसला याये न्ह्यः थुपिं स्वंगुलिं पक्षयात उपस्थित याकी, इमिगु खँ न्यनी अले थःगु फैसला न्यंकी । तर थ्व संसारय् मनूयात जक मखु, सायात नं अदालतय् उपस्थित याकाः फैसला याःगु घटना दु ।

भारतया राजस्थानया जोधपुरया छगू अदालतय् सायात उपस्थित याके धुंकाः जक न्यायाधिशं थःगु फैसला न्यंकूगु दु । जोधपुरया जिल्ला अदालत साया स्वामित्वया विषययात कयाः न्ह्यानाच्वंगु मुद्दाया झ्वलय् सायात हे अदालतय् उपस्थित याकूगु खः ।

श्याम सिंह व ओमप्रकाश नांया स्थानीय निम्ह मनूया दथुइ उम्ह साया थुवाःया विषययात कयाः विवाद जुयाच्वंगु खः । थ्व विवाद वंगु दछि न्ह्यवंनिसें हे न्ह्यानाच्वंगु जुयाच्वन । न्हापां ला प्रहरी चौकी लानाच्वंगु थ्व विवाद ज्यंकेत प्रहरीं नं आपालं कुतः याःगु खः । तर पुलिस चौकीं विवाद ज्यंके मफयेवं थ्व मुद्दा वंगु अप्रिल महिनाय् अदालतय् वन ।

अदालतय् मुद्दाया पेशी दुकुन्हु न्यायाधिशं सायात नं अदालतय् उपस्थित याकेत आदेश बिल । उकुन्हु अदालतया नियमित इजलासया क्वथां पिने अदालत परिसरय् सा चिनातःगु थासय् इजलास दयेकूगु खः । वयां लिपा थःपिंत साया थुवाः धकाः दावी यानाच्वंपिं निम्हेसित अदालतय् थने हल ।

निम्हेसिनं पालंपाः सायात ज्वनाः चाःहिकल, साया म्हय् वास्यावास्या यात । निम्हेसिनं सायात यानाच्वंगु व्यवहार व उकिया गतिविधियात न्यायाधिशं गम्भिरतापूर्वक स्वयाच्वन । निम्हेसिकें बयान नं कायेधुंकाः साया भौतिक पहिचानीकरण याःगु खः ।न्यायाधिशं दक्वं प्रक्रियायात बांलाक स्वयेधुंकाः साया वास्तविक थुवाः ओमप्रकाश जूगु फैसला न्याकुसे वयात हे सा लःल्हायेत आदेश बिउगु खः ।