ताम्राकार समाजया क्षमता विकास तालिम

यल (नेपालभाषा टाइम्स)- ताम्राकार समाजया ग्वसालय् मिस्तय् लक्षित यानाः स्वन्हुयंकंया क्षमता विकास तालिम जूगु दु । ज्याझ्वलय् पीन्याम्ह मिस्तय्त स्टार्टअप, डिजिटल मार्केटिङ, पर्सानालिटी डेभलपमेन्ट, बैंकिङ प्रोसेस लगायतया विषयय् तालिम बिउगु खः ।

यल महानगरपालिकाया ग्वाहालिं स्वन्हुयंकं जूगु तालिमय् स्टार्टअप विषयय् उपाय सर्भिसेसया सुमन रायमाझी, डोल्मा फाउन्डेशनया निकिता वज्राचार्य, डिजिटल मार्केटिङया बारे कमला लामा, पर्सनालिटी डेभलपमेन्टया बारे उषा मल्ल, बैंकिङ प्रोसेसया बारे सिद्धार्थ बैंकया शोभा शिवाकोटीं कक्षा कयादीगु खः । ज्याझ्वलय् वरिष्ठ महिला उद्यमी श्यामवदन श्रेष्ठ, उद्यमीपिं रज्जु रंजितकार, लजना श्रेष्ठपिंसं थःथःगु अनुभव कनादीगु खः ।

ज्याझ्वःया अन्तिम न्हि कुन्हु यल महानगरपालिकाया उपप्रमुख मञ्जुरी शाक्य वज्राचार्यं सहभागीपिंत दसिपौ लःहानादिसें मिस्तय् इच्छाशक्ति बल्लाइगु जूगुलिं उकिया सदुपयोग यायेफयेमा धयादिल । तालिमय् सयेकागु खँ व्यवहारय् लागु यायेफत धाःसा मिस्त सफल उद्यमी जुइफइगु विश्वास वय्कलं प्वंकादिल ।

ज्याझ्वःया संयोजक गुणकेशरी ताम्राकारीं उद्यमी जुइ न्ह्याःपिं मिस्तय्त महानगरपालिकां आवश्यक आर्थिक व्यवस्थापन व बजार प्रवद्र्धनया निंतिं पहल यानाबीत इनाप यानादिल ।

ताम्राकार समाजया अध्यक्ष विनोद ताम्राकारया सभापतित्वय् जूगु समापन ज्याझ्वलय् व्यवसाय विकास उपसमितिया संयोजक प्रवल ताम्राकारं समाजया सदस्यपिनि व्यवसाय प्रवद्र्धनया निंतिं समाजं थीथी ज्या याना वयाच्वंगु खँ कनादीगु खः ।