विप्लवया आधार क्षेत्रय् छापा

येँ – नेपाल कम्युनिष्ट पार्टीया अध्यक्ष नेत्रविक्रम चन्दया गामं प्रहरी तःधंगु ल्याखय् हातहतियार व विष्फोटक पदार्थ बरामद याःगु दु । कपिलवस्तुया शिवराज नगरपालिकाया–९ शिवगढी गामय् च्वंगु नेकपा कार्यकर्ता दुर्गाबहादुर रोकाया छेँ नं एसएमजी २ थान, उकी तइगु म्यागेजिन स्वंगू, गोली ६८ गः, एन १६ ल्वाभःया गोली १२९ गः, चाइनिज पेस्तोल छपु, म्यागेजिन पेस्तोल निपु, रिमोट छगः, वायरिङ तार ४० मिटर लगायत ल्वाभः बरामद याःगु खः । थ्व बरामद याःगु गां चन्दया थःगु हे गां जूगु खँ धाःगु दु । थ्व गांयात विप्लवया आधार इलाका कथं कयातःगु दु । थन हतियार दयेकेगु ज्या तकं जुयाच्वंगुलिं प्रहरी ताः ईनिसें निगरानी तया वयाच्वंगु खः ।

थ्व सामान ज्वनेगु झ्वलय् प्रहरीं छेँथुवाः रोकायात नं गोलीं कयेकाः ज्वंगु खः । प्रहरी वःगु खनेवं बिसिउँ वनेत स्वयेवं रोकायात तुतिइ गोली कयेकूगु खः । रोकायात आः लुम्बिनी अञ्चल अस्पताल बुटवलय् वासः याकातःगु दु ।

वडा प्रहरी कार्यालय चन्द्रौटाया प्रहरी निरीक्षक महेश्वर उपाध्यायया नेतृत्वय् वंगु स्वंगू पुचलं स्थानीय झिंन्याखा स्वयां अप्वः छेँय् छापा मारे याःगु खः । विप्लवया काय्चा यादव चन्दया छेँय् नं प्रहरीं बिहीवाः सुथय् सर्च यायेवं छुं ई तनाव ब्वलंगु खः ।

प्रहरीं छापा मारे याःवःगु इलय् स्थानीय वासिन्दां छझाः प्रतिकार नं याःगु खः । थ्व झ्वलय् जूगु दागादुगुइ निम्ह प्रहरी जवान घाःपाः नं जूगु दु । प्रहरी जवान अमर वली व पुतली चौधरी घाःपाः जूगु खः । प्रहरीं उगु क्षेत्रय् आपालं विप्लवया नेता कार्यकर्ता ज्वनेगु कथं छापा मारे याःगु खःसां स्कुलया मस्त तकं वयाः प्रहरीयात घेरे यायेवं थःपिं संयम जुयाः लिहां वयेमाःगु खँ प्रहरीं धाःगु दु ।

शिवगढीइ सैन्य शिविर
प्रहरीं छापा मारे याःगु थाय् शिवगढी गां विप्लव पुचःया सैन्य शिविर हे जूगु खँ धाःगु दु । छापा मारे यायेगु झ्वलय् उगु थासय् पार्टी कार्यकर्तायात सैन्य तालिम बियाच्वंगु लिसें ‘सैन्य शिवर’ च्वयातःगु ब्यानर लुइकूगु खः । प्रहरीं धाःकथंं अन सैन्य तालिम जुयाच्वंगु सूचं वःगुलिं हे उगु लागाय् प्रहरीं निगरानी याना वयाच्वंगु खः । सैन्य शिविरया सुचं वयेवं प्रहरीया मू ज्याकूपाखें हे विशेष ध्यान बियाच्वंगु खः