सवारी लाइसेन्स झिदँय् छक्वः यायेगु तयारी

येँ (नेपालभाषा टाइम्स)- सरकारं सवारी साधन चले यायेत माःगु लाइसेन्सया नवीकरण झिदँय् छक्वः जक यायेगु तयारी याःगु दु । भौतिक पूर्वाधार तथा यातायात मन्त्री प्रकाश ज्वालां मंगलवाः प्रतिनिधि सभा संसद्य् संवोधन यायेगु झ्वलय् स्मार्ट लाइसेन्स झिदँ छक्वः जक नवीकरण याःसां गाइगु कथं तयारी न्ह्यानाच्वंगु जानकारी बियादीगु खः ।

थौंकन्हय् सवारी लाइसेन्स न्यादँय् छक्वः नवीकरण यायेमाः । मन्त्री ज्वालां झिदँय् जक नवीकरण याःसा गाइकथं कानुनय् हे व्यवस्था यायेत्यनागु जानकारी बियादीगु खः । थ्व झ्वलय् वय्कलं स्मार्ट लाइसेन्स वितरण यायेगु ज्या सहज व सरल दयेकेगु निंतिं ज्या न्ह्यानाच्वंगु खँ धयादीगु खः ।

‘न्यादँय् छक्वः नवीकरण यायेमाःगु झन्झटया ज्यायात आः झिदँय् जक नवीकरण याःसा गाइकथं परिमार्जन यायेत्यनागु दु, थुकिं यानाः स्मार्ट लाइसेन्स छापे यायेगु लोड नं म्हो जुइगु विश्वास कयागु दु’ संसदय् संवोधान यासें मन्त्री ज्वालां धयादीगु दु । अथेहे सवारी साधनय् तयेमाःगु इम्बोज नम्बर प्लेट नं अंग्रेजी, नेपाली वा अंग्रेजी व नेपाली नितां तयेफइ कथं व्यवस्था यायेत्यनागु जानकारी नं वय्कलं बियादीगु दु ।