ने. सं. ११४४ कौलाथ्व चौथी -

स्वंगू मध्ये निगू सिटय् रास्वपा न्ह्यःने

येँ (नेपालभाषा टाइम्स)- चितवन, तनहुँ व बारा जिल्लाय् म्हीग क्वचाःगु उपनिर्वाचनया लिच्वः वयेगु शुरु जूगु दु । म्हिगः बहनी तकया लिच्वः स्वयेबलय् गं चिं दुगु रास्वपां स्वंगू क्षेत्र मध्ये निगू क्षेत्रय् त्याकीगु निश्चित धइथें जुयाच्वंगु दु ।

चितवन–२ लय् पार्टी अध्यक्ष रवि लामिछानें न्हापा थें हे अग्रता कयाः न्ह्याः वंगु दु । चितवनया गुलिखे थासय् न्हापा एमालेयात अप्वः मत वंगु त्वालं तकं थुगुसी रवि लामिछानेया पक्षय् मत वनाच्वंगु खने दयाच्वंगु दु । चुनावी लिच्वःया गति थ्वहे जुल धाःसा लामिछानेया विजय निश्चित दुगु खँ राजनीतिक नेतातय्सं हे धयाहःगु दु ।

न्हापा नं लामिछाने हे त्यानाच्वंगु उगु निर्वाचन क्षेत्रय् वय्कःया नागरिकता सम्बन्धी प्रकरणया कारणं पद खारेज जूगुलिं हानं उपचुनाव यायेमाःगु खः । लामिछानेया पासपोर्ट सम्बन्धी प्रकरण धाःसा अदालतय् अझ नं विचाराधीन अवस्थाय् लानाच्वंगु दिन । उकिया फैसला जुइबलय् वय्कःया पद छु जुइगु खः धाये फइगु अवस्था मदुनि ।

तनहुँ–१ य् रामचन्द्र पौडेल राष्ट्रपति जुइवं खाली जूगु सिटय् रास्वपाया हे उम्मेदवार डा. स्वर्णिम वाग्ले त्याइगु निश्चित खने दयाच्वंगु दु । वय्कः थः निकटम प्रतिद्वन्द्वी स्वयां यक्व हे न्ह्यःने लानाच्वंगु दु । वय्कः त्यात धाःसा देय्या अर्थमन्त्री जुइ धकाः दावी यानाच्वंसां संघीय संसदया वर्तमान समीकरण स्वयेबलय् कांग्रेस सभापति शेरबहादुर देउवां वय्कःयात अर्थमन्त्री दयेके बीगु सम्भावना तसकं म्हो जक खनेदु ।

उखे जसपाया रामसहाय प्रसाद यादव उपराष्ट्रपति जुइवं खाली जूगु बारा–२ लय् जसपाया उपेन्द्र यादव व जनमत पार्टीया शिवचन्द्र कुशवाहाया दथुइ तीव्र प्रतिस्पर्धा जुयाच्वंगु दु ।