न्हय्गू थासय् सुरुङमार्ग निर्माण याइगु

येँ – सरकारं देय्या थीथी न्हय्गू थासय् सुरुङमार्ग निर्माण याइगु जूगु दु । देय्या भौगोलिक बनावट व मेमेगु जटिलताया कारणं यातायात संचालय् खने दयाच्वंगु असहजतयात ध्यानय् तयाः सुरुङमार्गया योजना न्ह्यःने हःगु खः । अर्थमन्त्री डा. युवराज खतिवडां सार्वजनिक यानादीगु वइगु आर्थिक दँया बजेटय् नं सुरुङमार्ग निर्माणयात प्राथमिकता बियादीगु दु ।

यातायात संचालनय् जुयाच्वंगु असहजतायात सहज यायेगु ल्याखं दकलय् न्हापां पृथ्वी राजमार्गया नौबिसे–नागढुंगा खण्डय् सुरुङमार्ग दयेकेगु शुरु यायेगु नं बजेटय् न्ह्यथनातःगु दु । अथे हे येँ–नुवाकोट जिल्लायात स्वायेगु ल्याखं तोखा लागाय् नं सुरुङमार्ग निर्माण यायेगु लक्ष्य सरकारं काःगु दु ।

सुरुङमार्ग निर्माण योजना अन्तर्गत कोटेश्वर–जडीबुटी, वीपी राजमार्गया खुर्कोट–चियाबारी, गणेशमान सिंह मार्ग अन्तर्गत थानकोटनिसें मकवानपुरया चित्लाङ खण्डय् नं सुरुङमार्ग निर्माण यायेगु योजना दु ।थुकथं हे स्वनिगलं पिने बुटवलया सिद्धार्थ राजमार्ग अन्तर्गतया बुटवल–पाल्पा सतकखण्ड् नं सुरुङमार्ग निर्माण यायेगु लक्ष्य सरकारं कयातःगु दु ।

सुरुङमार्ग निर्माणया निंतिं सर्वेक्षण यानाः आवश्यक प्रक्रिया वइगु आर्थिक दँनिसें हे शुरु यायेगु लक्ष्य सरकारं कयातःगु दु ।
सुरुङमार्ग निर्माणया निंतिं उकी प्रयोग जुइगु उच्च प्रविधिया सुरुङ म्हुइगु मेशिनलिसें पूर्वाधार निर्माणय् प्रयोग जुइगु उपकरणसम्बन्धी सेवा उपलब्ध याकेत, सम्भाव्यता अध्ययन, डिजाइनया निंतिं परमर्श कम्पनी स्थापना यायेगु सरकारं तयारी याःगु दु ।