एसइइ व उच्च शिक्षा हासिल यानादीपिंत सम्मान

येँ –  नेपाल राष्ट्रिय खड्गी समाज यल जिल्ला समितिं समुदायपाखें एसइइ परीक्षा नापं उच्च शिक्षा हासिल यानादीपिंत हंगु दु । वंगु शनिवाः थनया क्वन्ति स्थित कुम्भेश्वर टेक्निकल स्कुलय् जूगु ज्याझ्वलय् हनेज्या याःगु खः । समाजया यल जिल्ला समितिया अध्यक्ष अरोजकुमार खड्गीया सभाध्यक्षताय् जूगु ज्याझ्वलय् यल महानगरपालिकाया प्रमुख चिरिबाबु महर्जन मूपाहांकथं झायादीगु खः ।

ज्याझ्वलय् समाजया केन्द्रीय महासचिव नन्दकिशोर शाही, पुलांम्ह सभासद जुठबहादुर खड्गी विशेष पाहाकथं झायादीगु खः ।मूपाहां यल मनपा प्रमुख महर्जनं त्वाःदेवाय् मत च्याकाः उलेज्या यानादीगु ज्याझ्वलय् ग्रायण्ड एकेदेमिया विद्यार्थीतय्सं वाद्यवादनपाखें नेपाःया राष्ट्रिय म्येँया धुन थानादीगु खःसा ज्याझ्वःया कजि संजय खड्गीं लसकुस यानादीगु खः ।

ज्याझ्वलय मूपाहां नगरप्रमुख महर्जनं एसइइ परीक्षा उत्तीर्ण जुयादीपिं छात्र, छात्रायात दसिपौ लःल्हानादीगु खःसा उच्च शिक्षापाखे चिकित्सा, विद्यावारिधि, इन्जिनियर, पाइलट, अधिवक्ता जुयादीपिंत हनेज्या याःगु खः । मूपाहां महर्जनं आतक एसइइ व उच्च शिक्षा हासिल यानादीपिंत छगू हे ज्याझ्वलय् हनेगु ज्या मजूनिगु धासें थुकथं छगू हे ज्याझ्वलय् थथे सम्मान याये खंगुलिं थः स्वयं भाग्यमानी जूगु खँ धयादिल ।

लिसें वय्कलं यल मनपा दुने एसइइ परीक्षा सर्वोत्कृष्ट ल्याः हयादीपिं विद्यार्थीयात नगद सहित पुरस्कृत यायेगु नं घोषणा यानादिल । समाजया महासचिव शाहीं संगठनपाखें जुयाच्वंगु थीथी गतिविधिया जानकारी बियादिसें जिल्ला समितित थुकथं हे सक्रिय जुयाः समाजयात न्ह्यःने यंकेत इनाप यानादिल । यल जिल्ला समितिया उपाध्यक्ष प्रकाश खड्गीं सुभाय् देछानादीगु खः ।

सम्बन्धित बुखँ

LEAVE YOUR COMMENTS