सतक विस्तारय् विश्व बैंकं लगानी मयाइगु

येँ – विश्व बैंकं सन् २०१८ य् आदिवासी अधिकार लागू यायेवं नेपाःया थीथी सतक विस्तारय् लगानी मयाइगु जूगु दु । आदिवासीया सम्मान मयाः धासें विश्व बैंकं न्हापा प्रतिवद्धता प्वंकातःगु लगानी नं आः मयाइगु खँ सूत्रं धाःगु दु । थ्वहे झ्वलय् कलंकी थानकोट सतक विस्तारय् नं विश्व बैंक लिचिलेगु तयारी यानाच्वंगु खँ धाःगु दु ।

थ्वहे झ्वलय् सीदु कथं सतक विस्तार यायेत अधिग्रहण जूगु जग्गाया मुआब्जा वितरण नं लाथेपाथे यानाच्वंगु दु । सतक विस्तारया झ्वलय् गुलिं गुलिं थासय् प्रति आना जग्गाया हे ४० लाख तका बियाच्वंगु दुसा विशेषतः नेवाःत दुगु थासय् धाःसा १ लाखंनिसें लाख ५० हजार तका बीगु यानाच्वंगु खँ सतक विस्तार पीडित संघर्ष समितिया अध्यक्ष सुमन साय्मिं कनादिल ।

थ्वहे झ्वलय् वंगु शुक्रवाः फास्ट ट्राय्क, बाहिरी चक्रपथ, १३२ केभी प्रसारण लाइन, स्मार्ट सिटी, बागमति करिडोर, सुख्खा बन्दरगाहया विरोधय् खोकना जनसरोकार समिति व बुंगमति जन सरोकार समितिया ग्वसालय् बुंगमतिनिसें मंगल बजाः तक उपत्यकाव्यापी सतक विस्तार पीडित संघर्ष समितिं एक्यबद्धता विरोध जुलुस पिकाःगु दु ।