गुप्तचर छाय् प्रधानमन्त्री मातहत ?

येँ – गृह मन्त्रालय अन्तर्गत लानाच्वंगु गुप्तचर विभागयात गृहपाखें छुटे यानाः तप्यंक हे प्रधानमन्त्री कार्यालय मातहत तयेयंकूगु खँय् माओवादी तम्वःगु दु । खास यानाः माओवादीया नेता रामबहादुर थापा गृह मन्त्री जुइवं हे प्रधानमन्त्री केपी ओलीं गुप्तचर विभागयात थः मातहत साला हःगु खँय् माओवादी सशंकित जूगु खः ।

सरकारं अझ नं माओवादीयात पत्याः मयाःगु व गुप्तचरया रिपोर्ट माओवादीयाथाय् मवनेमा धकाः हे अथे याःगु आशंका माओवादी नेतातय्के दु । गुप्तचर विभाग गृह मन्त्रालय अन्तर्गत लाइगु खःसां यदि प्रधानमन्त्रीं चाहे जुल धाःसा उकिया प्रमुखयात सःताः आवश्यक रिपोर्टिङ थम्हं नं कायेफु ।

अज्याःगु सुविधा दयेक दयेकं नं छाय् प्रधानमन्त्रीं पूरा विभाग हे थःगु मातहत साला काल धइगु न्ह्यसलं माओवादीयात सशंकित याना बिउगु खँ सूत्रं धाःगु दु । माओवादी अध्यक्ष पुष्पकमल दाहालं थ्व खँ एमाले नेतातय् समक्ष प्वंके नं धुंकूगु दु । थ्वहे झ्वलय् सीदु कथं गुप्तचर विभाग प्रधानमन्त्री कार्यालय मातहत हयेगु धकाः निर्णय जूसां आः तक उकिया कार्यान्वयन धाःसा जुइ फुगु मदुनि ।

थ्व विभागयात गय् यानाः प्रधानमन्त्री कार्यालय मातहत हयेगु धइगु खँय् आवश्यक कानून हे मदुगु जुयाः प्रधानमन्त्री कार्यालयं थुकी थःपिनि पहुँच कायम याये मफुगु खः । उकिं आः तक नं विभागया गुप्तचरतय्सं गृह मन्त्रालयय् हे थःपिनि ब्रिफिङ बीगु यानाच्वंगु दनि । एमाले–माओवादी पार्टी एकीकरणय् थ्व मुद्दा समेत छगू पंगः जुयाः दं वःगु जुयाः प्रधानमन्त्रीपाखें आः तुरुन्त हे कानून दयेकाः थुकियात थः मातहत हयेगु ज्या याइ मखुनि धकाः नं थन अनुमान याना हःगु दु ।