ताेखाय् बिस्काःया निंतिं यःसिं थन
येँ (नेपालभाषा टाइम्स)÷ तोखाय् बिस्काः जात्राया निंतिं मंगलवाः यःसिं थंगु दु । यःसिं थनेवं बिस्काः जात्रा न्ह्याःगु तायेकी । अथेखःसां मू जात्रा चैत मसान्त निसें वैशाख ४ गते तक न्ह्याइसा वैशाख ५ गते यःसिं क्वःथलेवं जात्रा क्वचायेकी । चैत मसान्त कुन्हु सिफुच्वय् बाघद्वारय् म्वः ल्हुयाः चण्डेश्वरी जुयाः सपनतीर्थय् वनीगु चलन दु । सपनतीर्थ देगः परिसय् गौमुखी व बहुमुखी खुसि थुनाः दयेकातःगु सिद्धपोखरीइ विक्रम संवत्या न्हूदँ वैशाख १ गते म्वःल्हू वनेगु चलन दु ।
चैत मसान्त कुन्हु सनिलय् सपनविनायकया खः, चण्डेश्वरीया खः व मसानकालीया खः ‘जाली द्यः’या रुपय् बाजं थानाः जात्रा याइ । वैशाख १ गते सनिलय् देय् चाःहिकाः सपनविनायक खः यलागः त्वालय्, चण्डेश्वरीया खः थलागः त्वालय् व मसानकालीया खः भुतखेलय् दिके यंकी । वैशाख २ गते सुथय् स्वखलं खः हाकनं देय् चाःहिकाः मसानकालीया खः भुतख्यःया फल्चाय् दिकेधु.काः बलि पुजा यानाः कोठु गणेद्यः व मसानकालीया खःयात थलागः त्वालय् यंकाः दिकी । न्ह्निय् तोखा कुमारी बिज्याकाः तलेजुपाखें सरकारी पुजा यानाः सिन्दूर जात्रा यानाः खलः ल्ह्वनी । थुकुन्हु हे सनिलय् देय् चाःहिकाः द्यःखः तपलाछिइ यंकाः दिके यंकी । थुकुन्हु चान्हय् द्यःखः न्ह्यःने भजनकीर्तन यानाः जाग्राम च्वनी ।
वैशाख ३ गते सुथ न्हापनं तपलाछिं सिन्दूर जात्रा यानाः खलः ल्ह्वनाः हयाः देय् चाःहिका हयाः हासल त्वालय् रथ दिकी । थुकुन्हु हे न्हिनय् ३ बजे पाखे तलेजु गुथिपाखें म्वाःद्यः गणेश व कुमारीसहित पुजा हयाः सिन्दुर जात्रा यानाः सरस्वती व महाद्यःया रथ बाहेक मेमेगु रथयात पुखुली हयाः जात्रा याइ । थुकुन्हु चान्हय् नं भजन यानाः चच्छि जाग्राम च्वनीगु चलन दु । जात्राया अन्तिम न्हि कुन्हु वैशाख ४ गते हाकनं सुथ न्हापनं सिन्दुर जात्रा यानाः बाजं सहित द्यःखःतय्त देय् चाःहिका हयाः सुथय् ११ बजे गच्छे त्वालय् यंकाः दिकेयंकी । उकुन्हु हे न्हिनय् ३ बजे तलेजु गुथिपाखें म्वाःद्यः गणेश व कुमारीसहित पुजा यानाः सिन्दुर जात्रा यानाः बासा लायाः द्यःखःयात देय् चाःहिकी । थ्व धुंकाः सकलें द्यःपिंत थःथःगु द्यःछेँय् दुकाइ । वैशाख ५ गते सुथय् हे यःसिं क्वःथलेवं तोखाया बिस्काः जात्रा क्वचाइ ।
सपनतीर्थ मेला
तोखाया सपनतीर्थय् दँयद्सं वैशाख १ गते सपनतीर्थ मेला जुइ । थुगु मेलाया इलय् देय्न्यंकंया लखौं भक्तजनत सपनतीर्थय् म्वःल्हुइत वइ । सपनतीर्थय् म्वःल्हुत धाःसा क्वरी ल्वय् नं लनावनीगु जनविश्वास दु ।
किवंदन्ती कथं परापूर्वकालय् सत्यवन्त जुजुया म्ह्याय्पिं मध्य् कान्छिम्ह म्ह्याय् सत्यकेशरीं थः अबुं ख्याः यानाः कोरी नाप ब्याहा जुइमा धकाः धाःकथं कोरील्वगी लिसे ब्याहा याइ । उम्ह ल्वगिं धाःसा न्हियान्हिथं छगू म्हमसिउगु पुखुली म्वःल्हुयागु व थःगु कोरिल्वय् लनावंगु म्हगसय् म्हनीगु जुयाच्वन । छन्हु छुं मस्तय्सं बुँइचा लानाः स्यानाः सपनतीर्थया पुखुली वांछ्वयाच्वंगु व उपिं बुँइचात हाकनं म्वाना वःगु खनी । थ्व खनाः वं नं मस्तय् ग्वाहालि कयाः सपनतीर्थया पुखुली म्वःल्हू वनी । थन पुखुली म्वःल्हुइवं वयागु कोरिल्वय् फुक्क मदयावनी । थ्व हे किंवदन्तीकथं सपनतीर्थय् म्वल्हुत धाःसा कारिल्वय् नं लनावनी धयागु विश्वासं थन म्वःल्हू वइगु खः ।
LEAVE YOUR COMMENTS