उद्योग बचे यायेत अर्थमन्त्रीयात ज्ञापन

येँ । लकडाउनया कारणं ध्वस्त जुइत्यंगु उद्योग व्यवसाय बचे यायेगु लागिं नेपाल राष्ट्रिय उद्योग व्यवसाय महासंघं सरकारयात इनाप याःगु दु । सत्तारुढ दल नेपाल कम्युनिष्ट पार्टी समर्थित उगु महासंघं म्हीग अर्थमन्त्री युवराज खतिवडायात छगू ज्ञापनपौ लःल्हासें उद्योग व्यवसाययात धरासायी जुइगुपाखें बचे यायेगु लागिं यायेमाःगु थीथी ९ गू ज्याया सुझाव नं बिउगु दु । यदि देयया औद्योगिक क्षेत्र धरासायी जुल धाःसा उकिया लिच्वः अर्थतन्त्र व रोजगारीया ख्यलय् बांमलाक लाइ धइगु चिउताः प्वंकुसें महासंघं उगु ज्ञापन लःल्हाःगु खः ।

महासंघया संयोजक लिसें पूर्व सांसद उद्योगपति लक्ष्मीदास मानन्धर व सहसंयोजक श्याम पाठकं सही यानाः लःल्हाःगु उगु ज्ञापनपती लकडाउनं यानाः तःधंगु मारय् लाःगु पर्यटन, कृषि थेंज्याःगु क्षेत्रया लागिं २ प्रतिशत व्याजया कर्जा बीत माग यानातःगु दु । अथे हे कायम जुयाच्वंगु लकडाउन अवधिया लागिं उद्योगतयत बैंकं ५ प्रतिशत सिबें अप्वः ब्याज काये मदइगु, लकडाउन अवधि तक विद्युत महसुलय् छुट बीमाःगु, लकडाउनं यानाः बन्द जुइगु अवस्थाय् थ्यनाच्वंगु उद्योगत पुनः सञ्चालन यायेत सरकारं सहुलियत दरं कर्जा बीमाःगु माग नं ज्ञापनपत्रय् न्ह्यथनातःगु दु ।

लकडाउन ताःहाकः जुया वंलिसे उकिया लिच्वः कथं देयया अर्थतन्त्र डाँवाडोल जुयाः आर्थिक उन्नति व सर्वसाधारणया रोजगारी समेत प्रभावित जुइ फइगु खँय् प्यखेरं चिउताः प्वंकेगु ज्या जुयाच्वंगु दु ।