ओलीया पंगः लिपा संवैधानिक परिषद्या बैठक नं पंगू

येँ (नेपालभाषा टाइम्स)- ताः ई लिपा च्वंगु संवैधानिक परिषद्या बैठक नं अन्ततः छुं हे निर्णय मयासे क्वचाःगु दु। म्हिगः प्रधानमन्त्री तथा मन्त्रिपरिषद् ज्याकुथी उगु बैठक च्वंगु खः । प्रमुख प्रतिपक्षी नेता केपी ओलीं संसदीय समिति गठक मयायेकं परिषद्र बैठक च्वनाया अर्थ मदु धकाः पंगः थंगु कारणं यानाः बैठकं छुं
निर्णय याये मफुगु खः ।

प्रधानमन्त्री पुष्पकमल दाहालया अध्यक्षताय् च्वंगु बैठकय् प्रतिनिधिसभाया सभामुख देवराज घिमिरे, राष्ट्रियसभाया अध्यक्ष गणेशप्रसाद तिमिल्सिना, उपसभामुख इन्दिरा राना, उपप्रधान लिसें रक्षा तथा कानुन मन्त्री पूर्णबहादुर खड्का व प्रमुख प्रतिपक्षी नेता केपी ओलीं ब्वति काःगु खः ।

बैठकय् प्रमुख प्रतिपक्षी नेता ओलीं संसदीय समिति गठनयात नं प्राथमिकता बीमाःगु अडान कायेवं बैठकं छुं निर्णय याये मफुगु खः । थ्व स्वयां न्ह्यः वंगु वैशाख ४
गते अध्यक्ष ओलीया छेँ बालकोटय् प्रमुख स्वंगू दलया नेतातय् दथुइ जूगु बैठकय् संवैधानिक परिषद्या बैठक तयाः प्रधानन्यायाधीश नियुक्तिया सिफारिस यायेगु धकाः
सहमति जूगु खः । तर म्हिगःया बैठकय् ओलीं संसदीय समिति निं न्हापां गठन यायेमाः, संसदीय समिति गठन मजूतले प्रधानन्यायाधीश सिफारिस यानाया छुं अर्थ दइ मखु
धकाः अडान कयादीगु खः ।

संवैधानिक परिषदं सिफारिस जुया वंसां नं संसदीय विशेष समिति गठन मजूतले प्रधानन्यायाधीशया नियुक्ति प्रक्रिया न्ह्याइ मखु धासें वय्कलं समिति निं न्हापां गठन
यायेमाःगु खँ तयादीगु खः । बैठकय् छुं हे निर्णय मजुइवं राष्ट्रियसभाया अध्यक्ष तिमिल्सिना रुस भ्रमण झाःगु दु। वय्कलं संवैधानिक परिषदया बैठकय् सहमति जुल धाःसा १२ गते लिहां वयाः हस्ताक्षर याये धयादीगु दु।

बैठकय् ओलीं उकुन्हु स्वंगू दलया नेतातय् दथुइ सहलह जूबलय् परिषद्या बैठक कन्हय् शुक्रवाः जक बैठक तयेगु धकाः सहमति जूगु खःसां म्हिगः हे बैठक सःतूगु खँय् नं आलोचना यानादीगु खः ।