मनपा अव्यवस्थित तार व्यवस्थापन

येँ – येँ महानगरपालिकां थःगु कार्यक्षेत्र दुने लाःगु थीथी थासय् अव्यवस्थित रुपं लानाच्वंगु तार व्यवस्थापन याःगु दु । येँ मनपां सतकय् अव्यवस्थित रुपं लानाच्वंगु तार व्यवस्थापन याःगु खः । थ्व झ्वलय् न्यय्निगः गाडी तारया व्यवस्थापन यायेगु ज्या जूगु मनपां न्ह्यथंगु दु । येँ मनपां वंगु मंसिरया न्हापांगु वालंनिसें हे सतकया थीथी थासय्अव्यवस्थित रुपं लानाच्वंगु तार व्यवस्थापन यायेगु ज्या न्ह्याकूगु खः । थ्व झ्वलय् वंगु सोमवाः छन्हुया दुने स्वंगः गाडी तार व्यवस्थापन याःगु खः । येँ मनपाया ज्याकू दुगु बागदरवार जःखः, लैनचौर, रत्नपार्क, पुलांगु बसपार्क, जमः, पुतलीसतक व त्रिचन्द्र क्याम्पस जःखः अव्यवस्थित रुपं तयातःगु तार संकलन यायेगु ज्या जूगु येँ मनपाया नगर प्रहरी निरीक्षक मीनबहादुर थापां जानकारी बियादीगु दु ।

मनपापाखें अव्यवस्थित तार संकलन यायेगु नापं सतकय् च्वंगु धू व्यवस्थापन यायेगु झ्वलय् उकुन्हु छन्हुं हे गुंगः गाडी धू व्यवस्थापन याःगु खः । धू मुनेगु नापं लाक्वपाक्व फोहर वांछ्वइपिंत नं निगरानी तयेगु, सतक विस्तारया झ्वलय् अथें लानाच्वंगु तार मुनेगु, अव्यवस्थित तार थःपिंसं हे चाना बीगु ज्या मनपां याना वयाच्वंगु दु ।मनपां तार व्यवस्थापन यायेगु झ्वलय् दकलय् अप्वः इन्टरनेटया तार अप्वः संकलन यानागु जानकारी बिउगु दु