सर्वोच्चय् दाहालया पुनरावलोकन

येँ -सर्वोच्च अदालतं नेपाल कम्युनिष्ट पार्टी (नेकपा) यात विभाजन यानाः हानं पुलांगु हे एमाले व माओवादी केन्द्र दयेकेगु कथं याःगु फैसलाया विरुद्ध पुनरावलोकन यायेगु लागिं म्हिगः माओवादी केन्द्रया अध्यक्ष पुष्पकमल दाहालं निवेदन दर्ता याःगु दु ।

वंगु फागुन २३ गते सर्वोच्च अदालतया न्यायाधीश बमकुमार श्रेष्ठ व कुमार रेग्मीया इजलासं नेकपा सम्बन्धी छगू रिटया फैसला यासें नेकपा भंग यानाः हानं पुलांगु हे माओवादी केन्द्र व एमाले कायम यायेगु फैसला याःगु खः । नेपाल कम्युनिष्ट पार्टी नां थःगु खः धासें ऋषि कट्टेलं तःगु रिटयात कयाः जूगु सुनुवाई लिपा सर्वोच्चं उगु फैसला न्यंकूगु खः । सर्वोच्चया उगु फैसला लिपा देय्या राजनीति हानं छक्वः डाँवाडोल जूवंगु खः। उकिं यानाः प्रधानमन्त्री केपी ओलीयात पुनः शक्तिशाली दयेका बिउगु खः ।

माओवादी केन्द्रया अध्यक्ष दाहालं म्हिगः पुनरावलोकनया निवेदन दर्ता यासें सर्वोच्च अदालत समक्ष थीथी गम्भीर न्ह्यसःत थनादीगु दु । वय्कलं दकलय् न्हापां ऋषिराम कट्टेलया ‘नेपला कम्युनिष्ट पार्टी’ व थःपिनिगु ‘नेपाल कम्युनिष्ट पार्टी (ने क पा)’ नां ज्वः लाः लाकि मलाः धकाः न्ह्यसः थनादीगु दु । अथे हे नां ज्वःलाःगु हे खःसां नां हिलेगु अवसर तकं मबिसे निगू पार्टी अलग अलग जुल धायेगु पाय्छि खः लाकि मखु धइगु न्ह्यसः नं वय्कलं तयादीगु दु । अथे हे पार्टी एकताया आधार धयागु नां जक मखु, पार्टीया ध्वाँय्, चुनाव चिं, विधान आदि नं जुइ धासें केवल नांया विवाद जुइवं थुपिं पक्षयात छाय् वेवास्ता यानागु धकाः नं वय्कलं न्ह्यसः तयादीगु दु ।

प्रतिनिधिसभा विघटनया मुद्दा स्वःगु इलय् तक सर्वोच्चं नेकपाया अस्तित्व स्वीकार याःगु खःसां लिपा उकिया अस्तित्व स्वीकार मयायेगु गज्याःगु नीति खः धकाः नं न्ह्यसः थनादीगु दु । सर्वोच्चया थ्व फैसला धयागु दलया दर्ता खारेज यायेगु सरह जू लाकि मजू धइगु न्ह्यसः नं वय्कलं तयादीगु दु । सवोच्चया उगु फैसला शुरुंनिसें हे विवादित जुयाच्वंगु दु ।

सम्बन्धित बुखँ

LEAVE YOUR COMMENTS