सुकुम्बासीयात बीगु जग्गाय् स्वनिगःया नेवाःतपाखें नं दावी यायेगु तयारी

येँ – सरकारं सुकम्वासीतयत राजधानी येँय् समेत जग्गा इनेगु धकाः तयारी यानाच्वंगु हे इलय् स्वनिगःया भूमिहिन नेवाःतयगु समस्याया लागिं नं संघर्ष यायेगु तयारी शुरु जूगु दु ।

थुकिया लागिं थौंकन्हय् थीथी नेवाः मुद्दायात कयाः आन्दोलन यानाच्वंगु थीथी खलः पुचःया दुजःपिनि दथुइ खँल्हाबल्हा जुयाच्वंगु दु । उकथंया सहलहय् दुथ्याःम्ह नेवाः अभियन्ता श्यामकृष्ण प्रजापतिं कनादीकथं थौंकन्हय् सुकुम्बासी धकाः न्ह्यःने वयाच्वंपिं मनूत स्वयां नेवाःतयगु भूमि समस्या अझ विकराल दुगु जुयाः थुकिया लागिं छुं यायेमाःगु आवश्यकता वाःचायेकाः थ्व तयारी जूगु खः ।

‘सरकारं सुकुम्बासीतयत येँय् समेत म्हतिं ६ आना जग्गा बीगु धकाः नियम दयेकूगु दु जब कि येँय् २ आना हे जग्गा मदुपिं नेवाःतयगु संख्या यक्व दु । यदि सरकारं सुकुम्बासीतयत अथे ६-६ आना जग्गा बिल धाःसा उमिगु न्ह्यःने थनया नेवाःत अप्वः भूमिपीडित जुइ । उकिं सरकारं बीगु ६ आना जग्गाया अधिकार थनया नेवाःतयत नं दयेमाः धइगु हे थ्व आन्दोलनया मुख्य लक्ष्य खः’ वयकलं कनादिल ।

सरकारं भूमिहिन सुकुम्बासीतय्त येँय् जूसा ६ आना व तराई लागाय् जूसा १० धुर जग्गा बीगु धकाः निर्णय यायेधुंकूगु दु ।

स्वनिगःया आपालं नेवाःत १ आना स्वयां कम जग्गा दुगु छेँय् च्वनाच्वंगु दुसा गुलिसिया अज्याःगु छेँ नं अंशबण्डा याये मानिगु अवस्था दनि । उकिं भूमिहिनतयत बीगु जग्गाय् स्वनिगःया नेवाःतयसं नं दावी याये दयेमाः व सरकारी निकायय् दावी नं याः वनेमाः धइगु बिचाः न्ह्यःने वयाच्वंगु दु ।

थ्व विषयय् थौंकन्हय् सडक विस्तार पीडितया सुमन सायमि, शेभ नेपाः भ्यालीया सुरज महर्जन, थँबहीया कमल पोखरी बचाउया भागवतनरसिंह प्रधान, थारु अभियन्ता लक्ष्मण थारु आदिपिंलिसे सहलह ब्यानाच्वंगु खँ नं प्रजापतिं कनादिल । लिसें थ्व ज्याय् अधिवक्ता विजयराज शाक्यं कानुनी सल्लाह बिया च्वनादीगु जानकारी नं वयकलं बियादिल ।

भूमिहिन वा सुकुम्वासीतयके स्वयां नं कम जक जग्गा दुपिं नेवाःतयसं राज्ययाके वनाः जग्गा दावी यायेत आः संगठन हे दयेकाः न्ह्याः वनेगु तयारी यानाच्वंगु जानकारी नं प्रजापतिं बियादीगु दु ।

‘आः संगठन हे दयेकाः न्ह्याः वनेगु बारे नं बिचाः जूगु दु । तर उकिया स्वरुप गज्याःगु जुइ व थुकिं छु गज्याःगु कानुनी प्रावधानत पूवंके माली धइगु खँय् कानूनविद्तपिं खँ जुयाच्वंगु दु’ वयकलं कनादिल ।

 

सम्बन्धित बुखँ

LEAVE YOUR COMMENTS