न्यखुइ अन्तर्राष्ट्रिय बौद्ध ध्यान केन्द्र निर्माणया निंतिं जग स्वन

यल (नेपालभाषा टाइम्स) – थनया न्यखुइ अन्तर्राष्ट्रिय बौद्ध ध्यान भावना केन्द्र निर्माण याइगु जूगु दु । यल महानगरपालिका वडा नं. १९ न्यखुइ ध्यान भावना केन्द्र निर्माणया निंतिं वंगु विहीवाः जग स्वनेगु ज्या जूगु दु ।

केन्द्रया नायः रामकाजी अवालेया सभापतित्वय् जूगु जग स्वनेज्या बौद्ध परम्पराकथं जूगु खः । उगु इलय् अखिल नेपाल भिक्षु महासंघया महासचिव भिक्षु कोण्डन्य महास्थविर, भिक्षु तपस्सीधम्म महास्थविर, भिक्षु तिस्स स्थविरपाखें परित्राण पाठ याना बिज्याःगु खः । भिक्षु महासंघया महासचिव भिक्षु कोण्डन्य, जग्गादाता दशलाल डंगोल, केन्द्रया अध्यक्ष अवाले, उपाध्यक्षपिं बागमति प्रदेशसभा सदस्य शोभा शाक्य व भवन निर्माण समितिया संयोजक अजरमान जोशी लगायतं जग स्वनेज्या यानादीगु खः ।

ध्यान केन्द्रया निंतिं प्रदेश सांसद शाक्यं प्रदेश सरकारपाखें ५० गू लाख यल महानगरपालिकाया मेयर चिरिबाबु महर्जनं १५ गू लाख, केन्द्रया अध्यक्ष अवालें १० गू लाख व दुजः तीर्थ शाक्यं १ गू लाख ग्वाहालि यानादीगु खः । करिब प्यदँ तकया लगातार कुतः लिपा भवन निर्माणया निंतिं जग स्वनेगु ज्या जूगु खःसा भवन निर्माणया निंतिं इच्छुक दातापिंसं नं आर्थिक ग्वहालि याये फइगु जानकारी उगु इलय् बिउगु खः ।