ने. सं. ११४४ कौलाथ्व षष्ठी -

बालेन साहयात येँया सिडीओपाखें काउण्टर

येँ (नेपालभाषा टाइम्स)- येँ जिल्ला प्रशासन कार्यालयं सरकारी ज्याय् खटे जुइपिं राष्ट्र सेवकयात निरुत्साहित जुइ कथंया अभिव्यक्ति मबीत इनाप याःगु दु । सहायक प्रमुख जिल्ला अधिकारी खड्गबहादुर श्रेष्ठं म्हिगः येँ महानगरपालिकाया मेयर बालेन साहया अभिव्यक्तियात लक्षित यासें विज्ञप्ति मार्फत उगु इनाप याःगु खः ।

बालेन साहया अभिव्यक्तिप्रति सिडीओ ज्याकूया गम्भीर ध्यानाकर्षण जूगु दु धासें विज्ञप्तिइ थःगु पदीय जिम्मेवारी व कर्तव्य पूवंकेत न्ह्यानाच्वंपिं राष्ट्र सेवक कर्मचारी विरुद्ध लाथेपाथे वक्तव्यबाजी मयायेत इनाप यानातःगु दु । प्रचलित कानुनया अःखः याइगु गुगुं नं कथंया गतिविधि नियन्त्रण यायेगु व विधिया शासन प्रत्याभूत यायेत स्थानीय प्रशासन व सुरक्षा निकाय प्रतिवद्ध दुगु खँ नं उकी न्ह्यथनातःगु दु ।

सार्वजनिक बिदा कुन्हु सरकारी गाडी छ्यलेबलय् सम्बन्धित अधिकारीपाखें जारी जूगु सवारी पास ज्वना जुइमाःगु खँ नं विज्ञप्तिइ लुमंकातःगु दु ।

वंगु शनिवाः येँ मनपाया मेयर बालेन साहं थः कलाः सविता काफ्ले च्वनावःगु मनपाया सरकारी गाडीयात ट्राफिक प्रहरीं दुव्र्यवहार याःगु धासें सिंहदरबार च्याका बीगु ख्याच्वः बिउगु खः । साहया उगु धापूयात कयाः सामाजिक सञ्जालय् व्यापक विरोध जुइवं साहया सचिवालयं विज्ञप्ति पिकासें ट्राफिक प्रहरीपाखें मेयरया गाडी चालक व वया कलाःयात दुव्र्यवहार याःगु धकाः द्वपं बिउगु खः । तर वकुन्हु ड्यूटीइ खटे जूम्ह ट्राफिक प्रहरीं धाःसा थःपिंपाखें नियमित कथं न्यनेकने जक जूगु धासें छुं कथंया दुव्र्यवहार मजूगु खँ धाःगु दु ।

बालेनया सचिवालयं ड्यूटीइ दुम्ह ट्राफिकयात द्वपं बियाः स्पष्टीकरण पित बीवं उकियात काउण्टर बियाः येँया सीडीओ कार्यालयं म्हिगः मेगु विज्ञप्ति जारी याःगु खः । यक्व आलोचना वयेवं मेयर बालेन साहं सिंहदरवारय् मि तयेगु धकाः च्वःगु स्टाटस चुपचाप हटे याःगु दु । उगु स्टाटसया लागिं वय्कलं छुं कथंया क्षमा याचना नं यानादीगु मदु ।

उखे बालेनया बचाउ यानाः समाचार च्वःगु ‘रुटिन अफ नेपाल बन्द’ फेसबुक पेजयात नं यक्वस्यां आलोचना याःगु कारणं म्हिगःनिसें फेसबुक इन्स्टाग्रामय् उगु पेज हे बन्द याःगु दु । रुटिन अफ नेपाल बन्दयात नं बालेनया बचाउ यात धकाः यक्वःसां ब्वः बियाः च्वया हयेवं म्हिगः पेज बन्द याःगु खँ धाःगु दु ।