टेकु ट्रान्सफर स्टेशनया फोहर व्यवस्थापन

येँ(नेपालभाषा टाइम्स)- थनया टेकुइ च्वंगु ट्रान्सफर स्टेशनया फोहर व्यवस्थापन यायेगु शुरु जूगु दु । झण्डै निला न्ह्यवंनिसें ट्रान्सफर स्टेशनय् मुंकातःगु फोहर वंगु विहीवाःनिसें व्यवस्थापन यायेगु शुरु जूगु खः ।

फोहर व्यवस्थापनया निंतिं येँ महानगरपालिकां सहयोगी प्राप्त यायेवं निला न्ह्यःनिसें मुंकातःगु फोहर व्यवस्थापनया ज्या न्ह्याःगु खः । उगु थासय् ताःई न्ह्यःनिसें फोहर मुंकातःगुलिं दक्वं फोहरया अन्तिम व्यवस्थापन यायेत अझं छुं ई काइगु महानगरपालिकां न्ह्यथंगु दु ।

स्वनिगःया १८ गू स्थानीय तहया फोहर व्यवस्थापन याना वयाच्वंगु सिसडोल व बञ्चरेडाँडाया स्थानीयतय्सं छुं ई न्ह्यःनिसें थीथी माग तयाः पंगः थना वयाच्वंगुलिं उगु थासय् तक यंके मफयेवं टेकुया ट्रान्सफर स्टेशनय् मुंका तःगु खः । महानगरपालिकां अन च्वंगु दक्वं फोहर प्लाष्टिकं त्वपुयाः तयातःगु खः ।