भजन संस्था खलः व स्रष्टायात सम्मान
येँ(नेपालभाषा टाइम्स)÷केसु भजन ज्ञान गुथिं लिपांगु इलय् लोपोन्मुख अवस्थाय् लानाच्वंगु मौलिक भजन संरक्षणया निंतिं नियमित रुपं भजन याना वयाच्वंगु च्यागू थीथी भजन खलः व न्याम्ह भजन स्रष्टायात सम्मान याःगु दु । गुथिं मौलिक भजन संरक्षणया निंतिं धासें छुं दिं न्ह्यः छगू ज्याझ्वः यासें नियमित रुपं भजन याना वयाच्वंगु खः भजन खलः व स्रष्टायात सम्मान याःगु खः ।
ज्याझ्वलय् संस्थागत रुपं नियमित रुपं भजन याना वयाच्वंगु योगाम्बर भजन मण्डल (म्हय्पि, येँ), सिद्धिविनायक भजन खलः (पांगा, किपू), भास्तीपुर भजन ज्ञानमाला भजन खलः (बलम्बु, चन्द्रागिरि), विष्णुदेवी भजनल मण्डल (चन्द्रागिरि), भिमसेन भजन मण्डल (भिंद्यः त्वाः, येँ), त्रिरत्न भजन संघ (ओकुबहाः, यल), दत्तात्रय नव दाफा भजन (ख्वप) व रुद्रायणी भजन मण्डल–ख्वना, यल)यात सम्मान याःगु खः ।
थुकथं हे उगु ज्याझ्वलय् भजन सर्जक जनगायक भृगुराम श्रेष्ठ, वंगु मंगलवाः जक मदुम्ह नांजाःम्ह म्येँ हालामि नापं भाषासेवी जगमोहन वामि, चन्द्रकला शाह, लोक भजन म्येँ हालामि व च्वमि शिला पन्त, ल्याय्म्हम्ह भजन हालामि रामभक्त जोजिजूयात सम्मान याःगु खः ।
ज्याझ्वलय् नवासें प्राज्ञ दिनेशराज पन्तं नेपालय् लिच्छवीकालनिसें त्वाः त्वालय् देगः, फल्चा सतलय् भजन हालेगु यानाच्वंगु धासें नेपाःया म्हसीका नं देवालय्, देगय् चले जुइगु भजनया संरक्षण यायेमाःगु खँय् बः बियादिल ।
प्रा. डा. सुवर्णलाल वज्राचार्यं नेपालय् प्राचीनकालनिसें भजन प्रचलनय् दुगु खःसां भजनया विधि बारे आतक लिखित इतिहास लुया मवःनिगुलिं थुसिकया बारे थप अध्ययन अनुसन्धान यायेमाःगु खँ धयादिल ।
गुथिया अध्यक्ष तकं जुयाच्वनादीम्ह पुलांम्ह मुख्य सचिव केशवराज राजभण्डारीं भजनयात नं राज्यं थःगु विषय दयेमाःगु खँय् बः बियादिसें मोति मालेत समुद्रया क्वथ्यंक वनेथें भजन नं मनूतय् दुनेया मिखा खः धयादिल । पुलांगु शैलीं भजन हालेगु परम्परायात हाकनं पुनःजीवन बीत धाःसा अझ बांलाइगु वय्कःया धापू दु ।
ज्याझ्वलय् गुथिया कोषाध्यक्ष प्रकाशगम्भिर सिंह रायमाझी व सल्लाहकार प्रकाश प्रधानं नं नुगःखँ तयादीगु खः ।
LEAVE YOUR COMMENTS