पुस १५ य् कीर्तिपुर सिंगिंग आइडलया फाइनल

किपू – किपू नगरपालिकाया ग्वसालय् जुयाच्वंगु कीर्तिपुर सिंगिंग आइडल ११४२ या फाइनल थ्व हे वइगु पुस १५ गते जुइगु जूगु दु । किपू नगरपालिकां नेपाल संवत् ११४२ न्हूदँया लसताय् किपूया ल्याय्म्ह पुस्तायात सांगीतिक क्षेत्रय् आकर्षित यायेगु ताः तयाः कीर्तिपुुर सिंङ्गीङ आइडल ११४२ या ग्वसाः ग्वःगु खः ।

ज्याझ्वलय् झिंगुम्हेसित ब्वति काःगु खः । सहभागी झिंगुम्ह मध्ये काराओके राउन्डपाखें उत्कृष्ट झिम्ह ल्यःगु खः । थ्व हे झिम्ह उत्कृष्टपिं दथुइ पांगाय् न्हूगु दयेकूगु सिनेप्लेक्स हलय् फाइनल धेंधेंबल्लाः जुइगु खँ ज्याझ्वःया संयोजक हरिशरण साय्मिं कनादीगु दु । संयोजक साय्मिं रेडियो नेपालया निर्देशक टिका भण्डारीं उत्कृष्ट झिम्हेसिया मंकाः म्येँ (सामुहिक गायन) रेडियो नेपालं रेकर्ड यायेगु घोषणा यानादीधुंकूगु जानकारी नं बियादीगु दु ।

उत्कृष्ट झिम्हय् प्रशान्त सुवेदी, जोन महर्जन, दिवेन वज्राचार्य, रसिक मालाकार, अतुल मानन्धर, निकेश मानन्धर, नफिसा महर्जन, सुदेश महर्जन, कृपा बास्कोटा व एकता महजर्न लाःगु दु । फाइनल कासाय् प्रतियोगि सकसिनं छपु नेवाः म्येँ व छपु खस नेपाली भाय्या म्ये हाली ।

थ्व हे आधारय् न्हाप, लिय व लियालिउं ल्यइगु जुइ । फाइनल ज्याझ्वलय् पाहाँ कलाकारपिंसं नं म्येँ, हुलाप्याखंया लिसें किपू नगरपालिका वडा नं. १०या वडाध्यक्ष अमन महर्जनं स्टायन्डअप कमेडी न्ह्यब्वःगु खँ धाःगु दु ।

सम्बन्धित बुखँ

LEAVE YOUR COMMENTS