ओलीया कार्यकर्तापाखें नेतातय्त खतरा महसुस

येँ -सदनय् प्रधानमन्त्री शेरबहादुर देउवायात विश्वासया मत प्राप्त जुइवं हीमी चाःपिं एमालेया ओली समर्थक कार्यकर्तातय्सं उग्र प्रदर्शन याना हयेवं सरकारं सर्वोच्च अदालत लिसें थःत समर्थन याःगु पार्टीया वरिष्ठ नेतातय्गु सुरक्षा अप्वयेकूगु दु । सरकारं म्हीगंनिसें माओवादी केन्द्रया अध्यक्ष पुष्पकमल दाहाल व एमालेया वरिष्ठ नेता माधव नेपालया सुरक्षा व्यवस्था कडा याःगु खः ।

थौंकन्हय् ओली समर्थित कार्यकर्तातय्सं नेपाल लिसें नेपालया सांसदत जक मखु सर्वोच्च अदालतया प्रधानन्यायाधीश चोलेन्द्र शम्शेर जबरा व मेपिं न्यायाधीशतय्गु समेत पुत्ला च्याकेगु ज्या याःगुलिं सरकारं उपिं फुकसिगुं सुरक्षा व्यवस्था अप्वयेकूगु खः ।

माओवादी अध्यक्ष दाहालया सुरक्षा व्यवस्था म्हीगंनिसें अप्वयेकूगु खः । उकी न्हापा क्वपालेधुंकूपिं सुरक्षाकर्मीया संख्या हानं थपे याःगु खः । दाहालया सुरक्षा व्यवस्था थपे याःगु खँय् सार्वजनिक रुपं आलोचना नं जुयाच्वंगु दु ।

उकथं हे एमाले वरिष्ठ नेता माधव नेपालया सुरक्षा व्यवस्था नं अप्वयेकूगु दु । वय्कःयात न्हापा बियातःगु सुरक्षा क्वपाःगु खःसा आः उकियात नं थपे याःगु खः ।
नेपाल व दाहालयात बियातःगु सुरक्षा व्यवस्था अप्वयेकेगु ज्या आः यानातःगु कानुनी व्यवस्थाया अःखः जुल धकाः आलोचना याना हःगु दु । पूर्व प्रधानमन्त्री केपी ओलीया पालय् थःत विरोध याःपिं फुक्क धइथें नेतातय्गु सुरक्षा व्यवस्था घटे याना बिउगु खः । ओलीं पुलांम्ह जुजु ज्ञानेन्द्र शाहया सुरक्षाकर्मी समेत क्वपाला बिउगु खः । उकियात कयाः ज्ञानेन्द्रं सरकार समक्ष निवेदन यासें सुरक्षा व्यवस्था अप्वयेकेत इनाप नं याःगु खः तर सरकारं धाःसा उकियात वास्ता मयाः ।

आः सरकारं न्हापा क्वपाःगु सुरक्षाकर्मीया ल्याः हानं थपे याःगु खः । तर कानूनय् यानातःगु व्यवस्था संशोधन मयासे सुरक्षा थपे याःगु धकाः थ्व आलोचना जूगु खः ।
थुकिया नापं प्रधानन्यायाधीश चोलेन्द्र शम्शेर जबरा व सर्वोच्च अदालतय् नं सुरक्षा व्यवस्था थप याःगु दु । ओली समर्थित कार्यकर्तातय्सं जबरा विरुद्ध नं नाराबाजी यासें पुत्ला च्याकेगु ज्या यानाच्वंगु दु ।

सम्बन्धित बुखँ

LEAVE YOUR COMMENTS