ऐतिहासिक भ्याःचाद्यः हानं पुनर्स्थापना

येँ – थनया वंघः, केल, थाय्मदु व किलाघः दुवातय् च्वंगु ऐतिहासिक भ्याःचाद्यः हानं पुनर्स्थापना याःगु दु । स्थानीय त्वाःबहाःयापिं जानाः मछिन्द्र क्लबपाखें ग्वसाः ग्वःगु छगू क्षमापुजा लिपा द्यः पलिस्था याःगु खः । थ्व द्यः उगु दुवाःया दथुइ लँय् हे लानाच्वंगु दु । दुवातय् च्वंगु गालय् द्यः पलिस्था यानातःगु खः ।

यक्वस्यां अन द्यः दु धकाः मसिउ । सिउसां गज्याःम्ह द्यः धकाः मसिउ । छुं ई न्ह्यः मेलम्चीया लः हयेत पाइप लायेगु ज्या जूबलय् उगु गालय् च्वंगु द्यःया मूर्ति नं लिकाःगु खः । लिकायेधुंकाः उकियात सामान्य ल्वहं जक तायेकाः अन तः थन तः हे मदयेका बिल । लिपा स्थानीय मनूतय्सं उगु ल्वहंयागु मूर्ति लुइकाः हानं पलिस्था याःगु खः ।

पुजा याये न्ह्यः शनिवाः अन छगू क्षमा पुजा नं याःगु खः । आः वहे गालय् ल्वहंयाम्ह भ्याःचाद्यः पलिस्था यानाः उकिया द्यःने ख्यातुगु न्हाय्कं समेत तया बिउगु दु । थुकिं यानाः न्हाय्कनं क्वय् भ्याःचाद्यः बांलाक स्वये तकं फइगु जूगु दु । थ्वहे भ्याःचाद्यःया कारणं उगु थाय्या नां हे ‘भ्याःचाद्यः’ वा ‘भेंडासिंग’ जूगु खः ।

अन थ्व भ्याःचाद्यः गबले पलिस्था याःगु धइगु बारे गनं उल्लेख जुयाच्वंगु मदु । किंवदन्ती कथं थ्व भ्याःचाद्यः छम्ह तान्त्रिक खः । वयात स्याःबलय् वयागु छ्यं उखेंथुखें चाःहिलाच्वंगु जुयाः लिपा तन्त्रया बलं हे उगु छ्यंयात ज्वनाः अन क्वय् पलिस्था याःगु खः ।

नेवाः धार्मिक–सांस्कृतिक ख्यलय् भ्याःचा (भेंडा) यात द्यः माने यानाः पुजा यायेगु चलन थ्वहे छथाय् जक दु । भ्याःचाद्यः दुगु थ्व लागा किराँतकालय् हे विकसित जुइधुंकूगु थाय् खः धकाः अनुमान यानातःगु दु ।

सम्बन्धित बुखँ

LEAVE YOUR COMMENTS