गजि खुल्ला याकेत सर्वोच्चय् रिट

येँ (नेपालभाषा टाइम्स)- नेपालय् गजि खुल्ला यायेत परमादेश माग यासें म्हिगः सर्वोच्च अदालतय् रिट दायर जूगु दु । नेपाल फार्म व्यवसायी संघपाखें अधिवक्ता सरोज अधिकारी व ऋगेन्द्र गिरीं सरकारयात विपक्षी दयेकाः रिट तःगु खः । रिटय् प्रधानमन्त्री कार्यालय, गृह, कृषि तथा पशुपंक्षी। स्वास्थ्य, कानुन, वन तथा वातावरण मन्त्रालययात विपक्षी दयेकातःगु दु । रिटयात कयाः थौं पेशी दु ।

सार्वजनिक सरोकार विषय अन्तर्गत दायर याःगु उगु रिटय् औषध (नियन्त्रण) ऐन, २०३३ स दुगु व्यवस्था कथं नियमावली दयेकाः गजियात नियन्त्रण लिसें नियमन याकेत विपक्षीया नामय् परमादेश लगायत वा उपयुक्त जू कथंया आज्ञा, आदेश वा पुर्जी जारी यायेत माग यानातःगु दु ।

रिट निवेदनय् गजिं दयेकीगु वासलं क्रोनिक ल्वय्, मिखा ल्वय् अल्जाइमर, ट्राइकासाइट, माइग्रेन, इपिलेप्सी, अपाचन, अनिद्रा, छाति स्याइगु, ज्वर वइगु, श्वासप्रश्वासय् असहजता, हैजा, झाडा जुइगु लगायत २५० गू स्वयां अप्वः ल्वय् लंकेगु प्राकृतिक व वैज्ञानिक उपचारया नितिं वासःया गुण दुगु खँ नं धयातःगु दु । गजि खुल्ला जुइमाः धकाः छुं ई न्ह्यवंनिसें माग जुयाच्वंगु खः ।