जे.एन १ भेरियन्ट पुष्टि, निगरानी कडा

येँ (नेपालभाषा टाइम्स)- नेपालय् कोरोना भाइरस ओमिक्रोन भेरियन्टया सबभेरियन्ट जे.एन. १ खनेदयेवं नेपाःया फुक्कं नाका व अन्तर्राष्ट्रिय विमानस्थलय् निगरानी कडा यानागु खँ स्वास्थ्य तथा जनसंख्या मन्त्रालयया अधिकारीतय्सं धाःगु दु ।

सोमवाः नेपालय् जे.एन.१ भेरियन्ट लूगु पुष्टि जूगु खः । मन्त्रालयया कथं देय्या थीथी थासं संकलन याःगु झिंखगू नमूना मध्ये न्हय्गुलिइ जे.एन.१ भेरियन्ट खनेदुगु खः ।
न्हूगु सबभेरियन्ट खनेदयेवं कोभिड नियन्त्रणया निंतिं महामारीया इलय् ल्ह्वना थेंज्याःगु हे पलाः ल्ह्वनाः ज्या यानाच्वनागु खँ स्वास्थय तथा जनसंख्या मन्त्रालयया प्रवक्ता डा. प्रकाश बुढोथोकीं धयादीगु दु । वय्कलं धयादीगु दु, ‘जिमिसं आः महामारीया इलय् नालागु फुक्क कथंया उपाययात हाकनं सक्रिय यायेगु क्वःछिनागु दु, अले व हे कथं ज्या जुयाच्वंगु दु ।’

वय्कःया कथं नेपालय् ९२ प्रतिशतं बुस्टर मात्रा सहित खोप कायेधुंकूगुलिं थ्व सबभेरियन्ट अपाय्सकं लिच्वः धाःसा लाकीगु खनेमदु । ‘थ्व म्हो जक ग्यानापुगु सबभेरियन्ट खः । अय्सां दीर्घरोगी व ज्यष्ठ नागरिकतय्त यक्व लिच्वः लाकेफुगढुलिं जिमिसं निगरानी अप्वयेकागु दु’ वय्कलं धयादीगु दु ।

वय्कःया कथं जे.एन. १ संक्रमण पुष्टि जूपिं मनूत येँ, पोखरा, चितवन, ख्वप व धनगढीयापिं खः । उपिं विदेशं नकतिनि वःपिं खः कि वा विदेशं नकतिनि वःपिं मनूतलिसे सम्पर्कय् दुपिं खः धयागु मालाच्वनागु खँ वय्कलं धयादीगु दु । संक्रमित जूपिं मध्ये सुं नं अस्पताल भर्ना जुइमाःगु अवस्थाय् थ्यंक मदुगु खँ नं प्रवक्ता बुढाथोकीं कनादीगु दु ।