भाषा कानून हयेत मन्त्रीया बचं

येँ (नेपालभाषा टाइम्स)- बागमती प्रदेशया पर्यटन, उद्योग तथा सहकारी मन्त्री पुकार महर्जनं बाग्मती प्रदेशय् नेपालभाषा व तामाङ भाषायात नं सरकारी ज्याखँय भाषाया रुपय् लागू याकेया लागि आवश्यक कानुन दयेकेत थम्हं नं भूमिका म्हितेगु बचं बियादीगु दु । नेवाः देय् दबू स्वनिगः विशेष प्रदेशं वय्कःयात बधाई बिउगु वनेगु झ्वलय् मन्त्री महर्जनं थ्व बचं बियादीगु खः ।

वय्कलं प्रदेशया नीति तथा कार्यक्रमय् हे भाषा ऐन सम्बन्धित प्रस्ताव वइगु खँ कँसें संघीयताया अनुभूति जुइकथं भाषा सम्बन्धि ऐन थ्वहे संसदय् हयेगु व नेपालभाषा व तामाङ भाषायात प्रदेशया कामकाजि भाषा दयेकेगु प्रतिबद्धता प्वंकादीगु खः ।

ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जन लिसें बरिष्ठ उपाध्यक्ष नविन थेच्वमि, उपाध्यक्ष डा. अमिता प्रधान शाक्य, सचिव गंगादेवी महर्जन व कोषाध्यक्ष जीवनदेवी बज्राचार्य नं दीगु खः ।

लुमंकेबहः जू, थगुनेनिसें नेवाः देय् दबू व तामाङ घेदुंगपाखें थुकिया लागिं कुतः याना वयाच्वंगु खः ।