२७ वडाय् भवन दयेकेत्यंगु जग्गाया थुवाः क्लब

येँ -येँ मनपा २७ वडाया कार्यालय भवन दयेकेत्यंगु ज्याथाया जग्गा अन हे च्वंगु छुस्याबहाःया सम्पत्ति खः धकाः प्रचार जूसां छुस्या–बहाःयाके उकिया छुं प्रमाण धाःसा मदुगु खँ धाःगु दु । छुस्याबहाः न्ह्यःनेसं च्वंगु उगु जग्गाया लालपुर्जा वहे त्वाःया स्थानीय जनतां चायेकातःगु ज्याथा युवा तथा सामुदायिक विकास क्लबया नामय् दुगु जुयाः वडा ज्याकुथिं वहे क्लबलिसे जानाः वडा ज्याकू दयेकेत्यंगु खँ वडा अध्यक्ष चिनियाँमान वज्राचार्यं कनादीगु दु ।

वय्कलं कनादीकथं उगु जग्गाया लालपुर्जाय् क्लब व बौद्धिक विकास प्राथमिक विद्यालयया नां लानाच्वंगु दु । विद्यालय थँहितिया छगू विद्यालयलिसे मर्ज जुयाः थौंकन्हय् बन्द नं जुइधुंकल । उकिं स्थानीय सरकार ऐन कथं जग्गाया बछि हकदार अथें नं वडा ज्याकू जुइधुंकल । आः क्लबं नं वडा भवन दयेकेत सहमति बिउगु जुयाः अन थ्व वडा कार्यालय तयेत्यनागु खँ नं वय्कलं कनादिल । आः भवन दयेकेत्यंगु थ्व थासय् न्हापा क्लबया हे छेँ दुगु खः । वहे छेँ थुनाः तिनि वडा भवन दयेकेत्यंगु खँ नं अध्यक्ष वज्राचार्यं कनादिल ।

अन वडा भवन दयेकेगु लागिं तयारी जुयाच्वंगु ताःई दयेधुंकलसा थुकिया बारे सकलें त्वाःबहाःयात जानकारी नं दु । अबलय् सुना नं छुं मधाः, तर आः वयाः छक्वलं छुस्याबहाःया छुं मनूतय्सं जग्गा दावी याःगुलिं स्थानीय मनूत हे अजूचायाच्वंगु खँ २७ वडाया सदस्य नरेशमान महर्जनं कनादिल ।
वय्कलं कनादीकथं वडां भवन दयेकेत्यंगु जग्गाय् छगू खुल्ला थाय् स्वानाच्वंगु दु । उकी न्हापा बय्लाछि फल्चा दु धायेगु याः । उकिया कित्ता नं. १७५८ खःसा वडां छेँ दयेकेत्यंगु जग्गाया कित्ता नं. २१३१ खः । फल्चा धयातःगु जग्गाय् वडां छुं दयेकेत्यंगु मदु । वडा अध्यक्ष वज्राचार्यं यदि अन फल्चा दुगु किपा वा छुं प्रमाण लुल धाःसा वडां फल्चा हे दयेका बीगु खँ कनादीगु दु ।

मेखे छुस्याबहाः संरक्षणया लागिं वडां दँय्दसं बजेट फ्यानातयागु जुयाः थःपिंत सम्पदाविरोधी धकाः द्वपं बिउगु पाय्छि मजूगु खँ नं वय्कलं कनादीगु दु ।

सम्बन्धित बुखँ

LEAVE YOUR COMMENTS