माओवादी धारया गुंगू पार्टीया मंकाः अपिल
येँ (नेपालभाषा टाइम्स)-माओवादी धारया गुंगू कम्युनिष्ट पार्टीं शान्ति प्रक्रियाया ल्यं दनिगु ज्या याकनं क्वचायेकेत सरकारयात माग याःगु दु । लिसें द्वन्द्वकालीन घटनाया निरुपण यायेगु नामय् संवैधानिक व्यवस्था स्वयां पिहां वने मदइगु खँ नं उमिसं धाःगु दु ।
म्हिगः छगू मंकाः पत्रकार सम्मेलन यासें द्वन्द्वपीडित नागरिक व उमि छेँजःपिंत न्याय बीगु नामय् सर्वोच्च अदालतं विद्यमान कानुनय् सुधार यायेत बिउगु निर्देशनय् थःपिनि ध्यान वंगु धासें शान्ति प्रक्रियाया ल्यं दनिगु ज्या पूवंकेत सरकारयात माग याःगु खः ।
गुंगू दलया मंकाः अपिलय् विस्तृत शान्ति सम्झौता व उकियात थःगु अभिन्न अंग माने यानातःगु नेपाःया संविधानं द्वन्द्वकालीन घटनाया निरुपण यायेगु जिम्मा सत्य निरुपण तथा मेलमिलाप आयोगयात बियातःगु जूगुलिं थ्व संवैधानिक व्यवस्था स्वयां पिहां वनेगु धइगु शान्ति सम्झौताया विरुद्ध वनेगु जुइ धकाः नं स्पष्ट याःगु दु ।
उकथं हे छुं ई न्ह्यवंनिसें संक्रमणकालीन न्यायया सम्बन्धय् जुयाच्वंगु चर्चा प्रति थःपिनि ध्यानाकर्षण जूगु धासें संक्रमणकालीन न्यायलिसे सम्बन्धित द्वन्द्वकालया फुक्कं मुद्दा सत्य निरुपण तथा मेलमिलाप आयोगया क्षेत्राधिकार दुने लाःगु खँ नं उकी न्ह्यथनातःगु दु ।
मंकाः अपिलय् नेकपा (माओवादी केन्द्र) या उपाध्यक्ष कृष्णबहादुर महरा, नेसपाया उपाध्यक्ष हिसिला यमि, नेकपाया महासचिव नेत्रविक्रम चन्द विप्लव, आम जनता पार्टीया अध्यक्ष प्रभु साह, वैज्ञानिक समाजवादी पार्टीया महासचिव विश्वभक्त दुलाल (आहुति), नेकपा (माओवादी समाजवादी) या अध्यक्ष कर्णजित बुढाथोकी व महासचिव रामनारायण पालपिंसं हस्ताक्षर यानातःगु दु ।
म्हिगःया पत्रकार सम्मेलन माओवादी धारया स्वंगू पार्टीं धाःसा बहिष्कार याःगु खः । मोहन वैद्य नेतृत्वया नेकपा क्रान्तिकारी माओवादी, धर्मेन्द्र बास्तोला नेतृत्वया नेकपा बहुमत व गोपाल किराती नेतृत्वया माओवादी कम्युनिष्ट पार्टीं पत्रकार सम्मेलन बहिष्कार याःगु खः । उपाध्यक्ष महरां ड्राफ्ट याःगु अपिलय् माओवादी केन्द्रया अध्यक्ष लिसें प्रधानमन्त्री पुष्पकमल दाहालं करेक्सन यायेवं उमिसं बहिष्कार याःगु खः ।
LEAVE YOUR COMMENTS