लुक्लाय् जहाजं हेलिकप्टरयात ठक्कर नकल, स्वम्ह सित

येँ– सोलुखुम्बुया लुक्लाया तेञ्जिङ्ग हिलारी विमानस्थलय् छगः जहाजं हेलिकप्टरयात ठक्कर नकेवं जूगु दुर्घटनाय् लानाः सीपिनि ल्याः स्वम्ह थ्यंगु दु ।

लुक्लां रामेछापया निंतिं ब्वयेत्यंगु समिट एयरया नाइन एनएएमएच विमान ब्वयेत न्ह्याः वनाच्वंगु इलय् धावनमार्गय् चुलुयाः विमानस्थलय् दिकातःगु मनाङ्ग एयरया हेलिकप्टरय् ठक्कर नकूगु खः । थव दुर्घटनाय् लानाः समित एयरया को पाइलट सुदीप ढुंगाना व पर्यटक प्रहरी असई रामबहादुर खड्का घटनास्थलय् हे मदुगु खःसा मेम्ह घाःपाः जूम्ह असई रुद्रबहादुर श्रेष्ठ नं वासः याकेत येँय् हयाच्वंगु इलय् लँय् तुं मंत ।

दुर्घटनाय् लानाः समिटया क्याप्टेन आरबी रोकाया व मनाङ्ग एयरया क्याप्टेन नं घाःपाः जूगु खः । समिटया क्याप्टेन रोकाया अवस्था गम्भीर दुगु खँ धाःगु दु । विमानय् दुपिं प्यम्ह यात्रु व एयर होस्टेस आर लामायात धाःसा सामान्य चोट जक लाःगु खँ धाःगु दु ।
सोलुखुम्बुया सीडिओ नरेन्द्र कुमार रानाया कथं थौं आइतवाः सुथय् ब्वयेगु निंतिं जहाज न्ह्याः वनाच्वंगु इलय् चुल्लुया अनियन्त्रित जुयाः पार्किङ्ग स्थलय् दिकातःगु हेलिकप्टरय् न्याःवंगु खः ।