किपू नपां स्थानीय पाठ्यक्रमया निंतिं सुझाव मुंकल

किपू (नेपालभाषा टाइम्स) – किपू नगरपालिकां स्थानीय पाठ्यक्रम तयार यायेगु निंतिं स्थानीय पाठ्यक्रम व पाठ्यसफू बारे सुझाव संकलन याःगु दु। किपू नगरपालिकां दयेकाच्वंगु नेपालभाषा पाठ्यक्रम व पाठ्यसफू गज्याःगु जुइमाः व छु छु विषयवस्तु दुथ्याकेगु धइगु ल्याखं सुझाव संकलन याःगु खः ।

किपूया हे मंगल मा.वि.इ जूगु मुँज्याय् स्थानीय पाठ्य सफुतिइ भाषागत रुपं गथे जुइमाः, विद्यार्थीतय्त गथे यानाः अध्यापन याकेगु धइगु सम्बन्धय् स्कुलया शिक्षकतपाखें सुझाव संकलन याःगु खः । किपू नगरपालिकाया प्रमुख रमेश महर्जनया उपस्थितिइ शिक्षा शाखाया जुजुभाई महर्जन, त्रिभुवन विश्वविद्यालयया पुलांम्ह उपकुलपति प्रा. डा. हिराबहादुर महर्जन, नेपालभाषा केन्द्रीय विभागया उप प्राध्यापक वज्रमुनि वज्राचार्य लगायतया सहभागिता दुगु खः ।

नगरप्रमुख महर्जनं विषयवस्तु स्वयां नं थौंया इलय् भाषा स्यनेगु ताः तयाः सफू तयार यायेमाःगु खँय् बः बियादीगु खः । थीथी ब्वनेकुथिइ नेपालभाषा विषय ब्वंकाच्वंपिं शिक्षक शिक्षिका, रेडियोय् नेपालभाषा ज्याझ्वः न्ह्याकाच्वंपिं पत्रकार व संचारकःमि, नेपालभाषा उत्थानया ज्याय्स क्रिय भाषा अनुरागी व अभियन्तापिनिगु नं सहभागिता दुगु मुँज्याय् वइगु शैक्षि सत्रनिसें स्थानीय पाठ्यक्रम अन्तर्गत नेपालभाषा विषय नं अध्यापन याकेगु कथं तयारी न्ह्यानाच्वंगु जानकारी बिउगु खः ।