सभामुखय् महराया दावी

संघीय संसदया सभामुखय् माओवादी नेता कृष्णबहादुर महरा जुइगु खँ जुयाच्वंगु दु । न्हापा उपप्रधानलिसें सूचना तथा सञ्चारमन्त्री जुयादी धुंकूम्ह महरायात सभामुख दयेकेगु तयारी माओवादी यानाच्वंसां नं उलि अपुक वय्कः सभामुख जुइगु सम्भावना धाःसा मदुगु खँ सीदुगु दु ।

पुलांम्ह अर्थमन्त्री वर्षमान पुन ‘अनन्त’ वर्तमान सरकारय् दुमथ्याकूगुलिं यानाः अनन्तं थः कलाः ओमसरी घर्तीयात सभामुख दयेकेमाः धकाः अडान कयाच्वंगुलिं समस्या ब्वलनाच्वंगु खँ सीदुगु दु । थुकिया बारे न्यनेकने यायेत माओवादी प्रवक्ता पम्फा भुसालयात स्वापू तयेगु कुतः यानागु खःसा वय्कलं फोन ल्ह्वनामदी ।
सीदुगु कथं पुलांम्ह सभामुख ओमसरी घर्तीं नं थःहे सभामुख जुइ दयेमाः धकाः लबिङ यानाच्वंगु खँ सूत्रं धाःगु दु ।

एमालेपाखें राष्ट्रपति विद्यादेवी भण्डारी हाकनं राष्ट्रपतिया उम्मेदवार जूगुलिं यानाः माओवादीं थःत सभामुख दयेकेमाः धकाः वय्कलं उगु दावी यानाच्वंगु खँ नं सूत्रं धाःगु दु ।