राज्यया फुक्क हे प्रमुख पदय् छगू हे जाति
येँ (नेपालभाषा टाइम्स)- सर्वोच्च पद राष्ट्रपतिइ रामचन्द्र पौडेलया विजय लिपा आः देय्या फुक्क हे प्रमुख पदय् खस ब्राम्हण समुदायया पकड कायम जू वंगु दु । थ्व स्वयां न्ह्यः प्रधानमन्त्री पुष्पकमल दाहाल, प्रतिनिधिसभाया सभामुख देवराज घिमिरे, राष्ट्रिय सभाया अध्यक्ष गणेश तिमिल्सिना, कावा प्रधानन्यायाधीश हरिकृष्ण कार्की, मुख्य सचिव शंकर वैरागी, प्रधान सेनापति प्रभुराम शर्मा, नेपाल प्रहरीया महानिरीक्षक धिरजप्रताप सिंह, सशस्त्र प्रहरीया महानिरीक्षक राजु अर्याल, निर्वाचन आयोगया प्रमुख आयुक्त दिनेश थपलिया, मुख्यमन्त्रीपिं नं कोशी हिक्मत कार्की, बागमती शालिकराम जम्कट्टेल, गण्डकी खगराज अधिकारी, लुम्बिनी लिला गिरी, कर्णाली रामकुमार शर्मा व सुदूरपश्चिमय् राजेन्द्र बहादुर रावल दी ।
राष्ट्रपति जूम्ह पौडेल २९ गते शितल निवास वनीगु
गणतन्त्र नेपाःया स्वम्हम्ह राष्ट्रपतिकथं रामचन्द्र पौडेल निर्वाचित जुयादीगु दु । राष्ट्रपतिया मेम्ह उम्मेदवार सुवास नेम्वाङयात पराजित यासें पौडेल राष्ट्रपतिइ निर्वाचित जुयादीगु खः ।
राष्ट्रपतिइ निर्वाचित जुयादीम्ह पौडेलं ३३ हजार ८०२ मतभार काःगु खःसा वय्कःया प्रतिस्पर्धी नेम्वाङं १५ हजार ५१८ मतभार काःगु खः । राष्ट्रपति चुनावय् संघीय संसदपाखें ३१३ म्ह व प्रदेशपाखें ५१८ म्ह सांसदतय्सं मतदान याःगु खः । चुनावी प्रक्रियाय् ब्वति काःपिं सकलें सांसदपिनिगु मुक्कं मतभार ४९ हजार ५९१ दु । राष्ट्रपति निर्वाचनया नितिं २६ हजार ३२५ मतभार माः ।
म्हिगः जूगु राष्ट्रपति चुनावय् राप्रपा व नेमकिपां धाःसा ब्वति मकाःगु खः । थुकिं चुनावय् राप्रपाया झिंप्यम्ह सांसद अनुपस्थित जूगु खःसा नेमकिपापाखें प्रेम सुवालं ब्वति मकाःगु खः । उकथं हे प्रदेशपाखे राप्रपाया नीच्याम्ह सांसद व नेमकिपाया स्वम्ह सांसदतय्सं मतदानय् ब्वति मकाःगु खः ।
उकथं हे माओवादी केन्द्रया सांसद वर्षमान पुन व कांग्रेसया सांसद चन्द्र भण्डारी वासः याकेत चीन व भारतय् वनाच्वंगुलिं वय्कःपिं नं मतदानय् उपस्थित जुया मदिल । उकथं हे एमालेया फरार सांसद लक्ष्मी महतो कोइरी नं मतदानय् ब्वति मकाःगु खःसा मधेश प्रदेशया जसपाया सांसद विन्दु यादव अनुस्थित जूगु खः ।
२००१ साल असोज २९ गते तनहुँया ब्यासय् बूम्ह पौडेल ६३ दँ ताःहाकःगु राजनीतिक यात्रा लिपा राष्ट्रप्रमुखय् निर्वाचित जुयादीगु खः । पौडेल खुक्वः तक सांसद व न्याक्वः तक मन्त्री लिसें छक्वः प्रतिनिधिसभाया सभामुख नं जुयादीगु दु । प्रजातान्त्रिक आन्दोलनय् पौडेल तःक्वः यानाः झिंन्यादँ जेलय् च्वनादीगु दु ।
वय्कलं आः फागुन २९ गते पदभार ग्रहण यासें शितल निवास प्रवेश यानादी ।
LEAVE YOUR COMMENTS