टोकियो ओलम्पिकय् विजयी कासामि थःम्हं हे पदक क्वखायेमालीगु

एजेन्सी- जापानया टोकियोय् जुइत्यंगु ओलम्पिकय् पदक त्याकीपिं कासामितयुसं थःपिंसं हे पदक क्वखायेमालीगु जूगु दु । अन्तर्राष्ट्रिय ओलम्पिक कमिटीया अध्यक्ष थोमस बाकं सञ्चार माध्यमयात बिउगु जानकारीकथं कोरोना भाइरस संक्रमण पाखें सुरक्षित जुइत कासामितय्सं थःपिंसं हे पदक क्वखायेमालीगु खँ धाःगु खः ।

विजयी कासामिपिंत क्वखायेकीगु पदक किस्तिइ तयाः हइगु व कासामि थःम्हं हे किस्तिं पदक कयाः क्वखायेगु जुइ । किस्ति ज्वनीम्ह मनूया नं कोरोना परीक्षण जुइसा किस्ति नं भाइरसमुक्त जुइगु अध्यक्ष थोमसं धाःगु दु । अथे हे अध्यक्ष थोमसं समारोह जुइबलय् सुनानं सुनाप नं ल्हाः मिले मयायेत व घय् पुइगु मयायेत नं इनाप यानादीगु दु । पदक विजेतातय्सं पदक वितरण जुइबलय् अनिवार्य मास्क तयेमाःगु व समारोहय् दुथ्याःपिं सकसिनं नं मास्क तयेमाःगु व्यवस्था याःगु दु । न्हापा ओलम्पिकय् ओलम्पिक कमिटीया सदस्य वा कासा सञ्चालन याइगु संस्थाया शीर्ष अधिकारीतय्सं पदक क्वखायेकेगु याइगु खः ।

जापानय् आपत्तकाल घोषणा यानाः ओलम्पिक यायेत्यंगु खः । ओलम्पिकया दक्व कासा खाली स्टेडियमय् जुइ । दर्शकतय्त स्टेडियमय् प्रवेशया अनुमति मदु । जापान सरकारं मिइधुंकूगु टिकट तकं रद्द यायेधुंकूगु दु ।