ने. सं. ११४६ दिल्लाथ्व चतुर्दशी -

सेना परिचालन जुइवं सुनसरीया स्थिति नियन्त्रणय्

सीडीओ व प्रहरी प्रमुखयात लित सःताः न्हूपिं छ्वल

येँ (नेपालभाषा टाइम्स) – सुनसरीया देवानगञ्जय् ब्वलंगु तनावय् सेना परिचालन जुइवं नियन्त्रणय् वःगु दु । वंगु आइवाः बहनि झडप जुयाः छम्हेसिया ज्यान वंगु खःसा गुम्ह गोलीं कयाः घाःपाः जूगु खः । घटना लिपा म्हिगः देवानगञ्ज जःखःया लागाय् तनाव ब्वलंगु खः । देवानगञ्ज लागाया आक्रोशित स्थानीयं कफ्र्यु त्वाःथलाः प्रदर्शन यायेवं सेना परिचालन याःगु खः । सेना परिचालन यायेवं अवस्था सामान्य जूगु खँ देवानगञ्ज गाउँपालिकाया अध्यक्ष बेचनप्रसाद मेहतां कनादीगु दु ।

अध्यक्ष मेहतां बियादीगु जानकारी कथं आक्रोशित प्रदर्शनकारीतय्सं देवानगञ्ज-३ या वडाध्यक्षया छेँय् तोडफोड याःगु खः । वडाध्यक्षया छेँय् मि तयेगु कुतः याःगु खःसा सुरक्षाकर्मीं पना बिउगु खः । छम्ह सर्वसाधारणया छेँय् धाःसा मि तयाबिउगु खः । देवानगञ्ज गाउँपालिका ३ कप्तानगञ्जय् आइतवाः बहनि झडप जुइवं प्रहरीं कयेकूगु गोलीं कयाः उगु हे थासय् च्वंम्ह ओमप्रकाश मेहता सीगु खः । घाःपाः जूपिं गुम्हेसित थीथी अस्पतालय् वासः याकातःगु दुसा निम्हेसिया अवस्था गम्भीर जूगु खँ मेहतां जानकारी बियादीगु दु ।

प्रदर्शनकारीतय्सं मि तयेगु व तोडफोड यायेवं स्थिति नियन्त्रणं पिहां वंगु धासें सेना परिचालन याःगु खः । जिल्ला प्रशासन ज्याकू सुनसरीं म्हिगः सुथय् ५ ताः इलंनिसें कफ्र्यु तःगु खःसा प्रदर्शनकारीतय्सं कफ्र्यु त्वाःथलाः प्रदर्शन यायेवं स्थिति नियन्त्रणय् कायेत सेना परिचालन याःगु खः ।

देवानगञ्जया घटना लिपा गृह मन्त्रालयं अनया प्रमुख जिल्ला अधिकारी (सीडीओ) व कोशी प्रदेशया डीआईजी सहित सुरक्षा अधिकारीतय्त लित सःतूगु दु । सुनसरीया प्रमुख जिल्ला अधिकरीयात लित सःताः अन आः संखुवासभाया सीडीओ ईश्वरीप्रसाद अर्यालयात छ्वःगु दु । कोशी प्रदेशया डीआईजी विनोद घिमिरेयात प्रहरी प्रधान कार्यालयय् लित सःतूगु दु । अन डीआईजी शेखर खनालयात छ्वयेगु निर्णय गृह मन्त्रालयं याःगु दु ।

उकथं हे जिल्ला प्रहरी ज्याकू सुनसरीया एसपी केशव थेबेयात गौतमबुद्ध विमानस्थलय् सरुवा याःगु दुसा वयागु थासय् गौतमबुद्ध विमानस्थलया एसपी पुष्पराज मल्लयात छ्वःगु दु । सशस्त्रया कप्तानगञ्जया डीएसपी नन्दकिशोर महतोयात नं लित सःताः डीएसपी मदन नाथयात छ्वःगु दु ।

थ्वहे झ्वलय् सम्भावित साम्प्रदायिक झडप ब्वलने फुगु धासें उकियात पनेगु निंतिं विषेश कुतः यायेगु निर्णय सर्वपक्षीय बैठकं याःगु दु । जिल्ला प्रहरी ज्याकू सुनसरीया प्रमुख एसपी केशवकुमार थेबें उगु लागाया सुरक्षा स्थिति पूर्ण नियन्त्रणय् वःगु जानकारी म्हिगःया बैठकय् याकादीगु खः।
सर्वपक्षीय बैठकय् ब्वति काःगु दक्वं राजनीतिक दल व सरोकारवालातय्सं थःथःगु थासं साम्प्रदायिक हिंसा , झडप व तनाव पनेगु निंतिं सक्रिय जुयाः न्ह्याः वनेगु प्रतिबद्धता प्वंकूगु जानकारी थेबें बियादीगु दु ।

सुनसरीया घटनायात कयाः म्हिगः सिरहा व राजविराजय् नं प्रदर्शन जूगु दु । प्रदर्शनकारीतय्सं राजविराजय् छुं ई टायर च्याकाः विरोध प्रदर्शन याःगु खः ।

प्रदर्शनकारीतय्सं सप्तरी जिल्ला प्रशासन ज्याकूपाखें सरकारयात ज्ञापन पौ नं बिउगु दु । ज्ञापन पती देवानगञ्ज घटनायात कयाः निष्पक्ष छानविन यानाः दोषीयात कारवाही यायेमाःगु, पीडित छेँजःपिंत उचित क्षतिपूर्ति बीमाःगु व थज्याःगु घटना दोहोरे मजुइकेत माःगु पलाः ल्ह्वनेमाःगु माग यानातःगु दु ।